有冇人知道如果狗狗比人領養之後會點樣呢??thx

其實點解你會問呢個問題呢？做資料收集？？

我本身係一個義工，而家暫養緊一隻俾人掉入垃圾桶既西施狗女，睇過醫生，佢最多只有２歲！佢仲係我家中生了兩隻bb！你覺得佢可憐嗎？如果你想領養狗狗，你會領養佢定係領養佢既bb呢？好多人問我，都係問領養bb，從冇人問過我關於領養佢既事，但你要知，佢都係只得２歲，年老嗎？不！只係有得選擇時，好多人都寧願揀bb！

我可以話你知既係，狗狗被人領養後生活得好唔好，並唔關乎於佢既年紀，我見過一隻年紀好細既狗狗俾人領養後遭主人虐待！亦有見過一個被領養時已經十歲有多既狗狗而家生活得好好！！即係話，佢地好唔好，係好睇個新主人（領養者）點對佢地！

我隻金毛仔都係領養，而家我覺得佢生活得幾好丫～
我俾我領養時只有１１個月大～而家３歲喇～

而年紀大與小既狗狗，佢地對環境既適態力．係好睇佢曾經經歷過既事同埋佢本身既性格係點而去得到結果！不過狗狗適應力好強，通常都好快就適應新既環境！


而一般由我地義工處理既case，我地都唔會將佢地安樂死，因為這是不人道既方法！佢地無罪o架！佢地只係冇一個愛佢既主人咋！但你話將佢送去某些大型動物機構的話，又或者送去漁農署的話，我就唔敢包佢地會唔會俾人安樂死喇！

希望我能解答你既問題！

無論被人買定領養既貓狗, 以後既生活幸唔幸福真係完全睇彩數, 大把人幾千蚊買隻狗番黎養左幾年之後厭啦, 隻狗唔再得意啦就忽視佢, 唔要佢甚至有 d 仲會拎佢黎做出氣袋, 打佢/虐待佢; 當然大部份人都仍然會當佢係仔女, 係家庭既一份子, 無論如何都唔會唔要佢; 領養番黎既因為唔駛錢, 可能只係比人領養黎看門口, 日晒雨淋不在話下, 有時連食得飽唔飽都成問題, 唔好再講主人根本唔愛佢; 又有新主人會覺得雖然領養既唔係咩名種狗, 但領養得佢番屋企, 就承諾一生一世照顧佢, 會待佢如珠如寶, 佢會比任何一隻狗都快樂~

基本上成年狗要再 rehome 係好難, 大部份想養狗既人都會選擇響狗 b 時期開始, 好似成年狗就養幾多年唔會同佢產生感情咁, 所以佢地可以再得到一個家既機會其實係好細, 只要去到 5-6 歲就更加可以打定輸數, 終生都唔會再有人愛鍚佢... 其實狗狗要投入一個新家庭唔係難事, 只要新主人真係愛佢, 比倒信心狗狗, 佢就會好似由細養到大既狗一樣咁忠心, 一樣會著緊, 一樣會成為新主人既好朋友!

除左 d 非慈善機構或狗場之外, SPCA 同漁護處收留既貓狗過左一段時候冇人領養就會人道毀滅, 好多年前一個 SPCA 既廣告勸人唔好遺棄動物, 影住一隻狗被人道毀滅既過程, 狗狗既絕望眼神我到呢一刻都記得, 不論睇幾多次我都會流眼淚..