請問中學生睇醫生(抑鬱)會唔會打電話比家長？或者如果學校知道咗系咪一定比家長知？有冇可能幫我一起瞞住家長？

其實我有情緒問題已經好耐了，我依家中三，第一次感覺到崩潰係中一上學期個考試，不過我就當壓力太大冇理，後來發生好多是，就不自覺開始自殘啦，我都唔知幾時開始，可能係由中一下學期到中二期間開始，一開始係手腕，但系發現自己係疤痕體質之後就自殘係手臂，夏天穿半袖見唔到（不過依家都好苦惱之前手腕嘅疤點樣可以蓋住），自殘嘅程度都越來越重，成日有一瞬間真系想去死，幻想好多死亡畫面，例如40樓跳落去，安眠藥，割腕，刀插心臟等等。但其實我好清楚自己唔會自殺，我嘅程度都未到咁恐怖，只不過幻想完會莫名舒服啲？但系都好擔心自己會唔會邊次係某啲大刺激下做咗衝動嘅傻事。

其實上面嗰段應該係廢話，講咗都冇人幫到我，而且要詳細講嘅話真系完全講唔完。
我其實唔知自己算唔算真系抑鬱，不過呢兩個星期情緒真系壓到我好辛苦，喊咗好多次，好莫名其妙嗰種，已經一個星期冇做過功課，因為一啲都提唔起精神做，全部都系欠（好在科長好多唔記我名），溫書都系逼自己，好多次都系睇咗啲書好耐，但其實乜都冇記入去。

所以想問下如果睇醫生嘅話，佢會唔會打電話比家長？或者學校社工知道會唔會打電話比我阿媽聽？仲有如果門診嘅話具體點做，我一次醫生都冇自己睇過，完全唔清楚，系咪門診嘅時候就要話自己有咩問題定點？
或者有冇可能幫我一起瞞著我阿媽？我真系好驚阿媽知原來我都有情緒問題，佢係情緒病患者，除左抑鬱仲有其他疾病，我唔可以比任何壓力我阿媽，佢真系會受唔住，但系我又清楚我好辛苦，都系諗咗好多個月，今次突然好辛苦先決定去睇醫生，真心希望有類似經驗嘅人可以幫下我。

其實我有諗過我最後有機會唔系抑鬱症，但系如果冇抑鬱，我呢幾年嘅痛苦究竟算乜？算矯情定貪玩自殘？從來冇人知我自殘、唔開心或者喊，我都知道自己唔系為吸引人哋而咁樣做嘅人，所以無論最後點，我都希望可以比一個交代自己，如果唔系真系顯到我好脆弱、好鐘意喊、好矯情。

感謝睇到呢度嘅所有人。