請問如何選擇SLA 3D printer?

巿面上較常見的 SLA（立體平板印刷）3D printer有三款, 以下為整理出來的小比較

laser機：
原理- 利用405nm laser 同埋振鏡去引導激光點於樹脂上繪畫成型
打印時間跟據模型大小改變，打印出黎嘅物件觀感上會比較順滑。

價錢：貴，formlab啲機唔平，打印面積為正方形。
效果&精度：成型嘅表面有一種一望落去就覺得好靚好detail嘅感覺，因為laser係畫個模型出黎，所以唔會出現所謂pixelation(我叫佢做像素紋，之後會講解)，所以睇落會好自然，亦都係點解咁多人鍾意佢嘅原因。

先天問題：變型同對焦問題，想像吓激光射落中心同邊位係會有唔同，打斜射落邊位除左會令對焦距離唔同之外，粒laser spot都會變左 ellipse, 某程度上會有變型，呢個有得做calibration去改善。至於激光嘅功率因為距離唔同而引致減弱嘅幅度超細，所以可以忽略。

DLP機：
利用DLP顯示技術用高壓水銀燈泡(光譜內有uv) or uv燈 投射出影像到樹脂上成型，如果想加快打印速度，可以將機內嘅色輪移除。

打印時間每層打印時間都一樣，與模型大小無關，打印面積可自由調整，越大精度越差，曝光時間都會增加。

價錢：貴，一部靚嘅projector唔平，而且投映對焦要一定距離，部機好難做細部，要印得細緻就要縮少打印面積，每次改位都tune餐死。

效果&精度：好，中心位置成像最好

先天問題：變型， 好似相機鏡頭咁,幾靓都好，邊位都唔會完全唔變形。同樣地，中心光度比周圍強，令到曝光時間不一致。會有像素紋出現。


LCD機：
利用已移走背光嘅LCD顯示屏，用405nm uv燈投射出影像到樹脂上成型，點解用405nm呢？因為lcd本身並唔係設計黎做3d printing,而且uv對lcd係會加速老化， 本身生産lcd時已經加上uv filter, 只有405nm以上嘅光先可以通過到，好彩大部份光敏樹脂都可以喺呢個範圍固化，雖然唔係最高效。

打印時間每層打印時間都一樣，與模型大小無關，不過打印面積不可自由調整，精度取決於屏幕嘅解像度，曝光時間跟據所用uv燈嘅功率而定。

價錢：平，好很平！ 就算uv射壞塊LCD, 當LCD係消耗品去換計落都貴唔過laser機換一兩次pdms

效果&精度：好，無變型問題

先天問題：取決於光源設計，一般中心光度都係比周邊強，令到曝光時間不一致，可以加塊菲鏡去改善。會有像素紋出現。lcd理論上會老化，玩幾耐先死就未知。另一個問題係lcd同成型表面嘅距離對打印嘅細緻度有莫大關係，因為uv唔似dlp咁可以對焦，距離成型表面越遠，散射越大，想像吓放塊牛油紙喺電視表面，基本上都可以好清楚咁睇到個畫面，但一攞開少少就已經會好糢糊。成件事就係咁。