坐小巴由 石籬商場二期 去會展

是否去書展?

石籬去港島朝早得一架去筲箕灣既紅色小巴 ($18), 平日07:30-09:00提供服務, 車程大約35分鐘以上 (視乎中環一帶交通情況).
會展舊翼出面有站, 舊翼可以行去新翼, 回程就直接由鰂魚涌上滿過海 (不停灣仔).
但聽過呢個服務好似唔係好穩定咁 (班次15-30分鐘, 不時都唔會有車), 唔係好建議坐呢架小巴.


除咗小巴之外, 朝早亦都有九巴935、936 ($18) 直達.
935可去到菲林明道落車, 返過地鐵站嗰邊上天橋一路行過去會展.
936可去到灣仔碼頭落車, 後面轉個彎就已經見到會展.
車程約45分鐘以上 (視乎中環一帶交通情況).
但935同936灣仔/銅鑼灣方向尾班車分別08:15同08:00開, 書展都係十點開 (最後一日就九點), 即使塞車, 你去到都有可能會早咗啲.

回程得935提供放工時間服務, 可沿地鐵站天橋返去軒尼詩道 (菲林明道) 上, 但星期一至五回程只開17:50、18:20, 星期六開12:55、13:20兩班.


唔啱時間搭小巴/935/936, 有以下方法:

1. 搭九巴31M ($4) 到葵芳站, 轉地鐵 (荃灣綫去金鐘轉港島綫) 去灣仔 ($13.8), 從A5出口沿行人天橋步行往會展.
31M車程約15分鐘, 港鐵連轉車大約35-40分鐘, 行過去約10分鐘 (視乎步速).
其實呢個方法朝早會穩陣過小巴/935/936好多, 起碼避開塞車位.


2. 搭31M去新都會廣場, 再行去興芳路乘搭城巴930 ($16) 到灣仔碼頭落車, 同936一樣後面轉個彎就到.
930車程約40分鐘 (視乎中環交通情況), 但注意930班次比較疏.

回程930同935一樣可於軒尼詩道 (菲林明道) 搭車.


3. 搭九巴31 ($4.3) 或專線小巴96/96M ($5) 落荃灣, 前往福來邨乘搭往灣仔紅色小巴 ($18).
西隧班次同筲箕灣小巴一樣於會展舊翼出面有站, 而紅隧班次則需到總站落車 (近地鐵站), 再上天橋行過去.
落荃灣估計都係20分鐘左右, 小巴車程約25-40分鐘 (視乎紅隧或中環交通情況).

回程小巴都係喺軒尼詩道近地鐵站橋底 (電腦城出面) 上車, 小巴回程亦都經葵芳, 可以直接喺葵芳轉31M而毋需入到荃灣轉車.

2015-07-15 11:42:48 補充：
記錯, 936應到入境事務大樓落車, 再經入境事務大樓/中環廣場行去會展 (936以前入灣仔碼頭).