幼兒教育課程

讀兩個月真係要睇下讀完之後可否註冊做合格幼稚園教師。教育局規定做幼稚園教師要有合格幼稚園教師資格，你讀完但無呢個資格等於浪費時間金錢。除公大及IVE外，教院有個2年制幼教高級文憑，每年學費$15,040，讀完可以申請註冊為合格幼稚園教師。耀中亦有個兩年制高級文憑，但一年學費五萬幾。幼師2014年起薪點大概$15000，頂薪$28,000，薪金少過小學教師差唔多$10000。幼稚園教師壓力唔比小學教師少，但薪酬差一大截。做幼教教師唔係只係對小朋友有愛心，喜歡小朋友就得，工作上要顧及學生安全，要處理家長查詢及行政工作，而家又多怪獸家長，王子公主。所以唔好以為學校假期多，三號風球唔需要返就好爽，唔好以為份工只係同小朋友玩下同照顧小朋友。小朋友放假教師都要返工做行政嘢，搞活動會特別忙。做幼教要差唔多十項全能，要有創意，設計課程，課室管理，同小朋友換片，搞活動，家長輔導等。有啲現職或者前職幼師投訴薪金同工作量不成正比，你諗下係唔係真係想做。