✔ 最佳答案
回樓主，你既問題實在問得非常好，有時得閒無野做，我亦真係會唸下呢個第三次世界大戰究竟會點打。不過想話樓主知，火車兄早於多年前另有高就離開yahoo知識，而老作家大哥亦同樣於多年前表示唔想再係yahoo知識發表文章。小弟一直希望與兩位神級高手交流學習，可惜兩位大哥始終真人不露相。係呢個yahoo知識人才凋零至慘不忍睹既時候，更令小弟緬懷當年軍事版各位高手熱烈交流既盛況。
關於蘇聯既冷戰及與之相關既總體戰戰略，坊間有好多極大既誤解，其中一個就係以為蘇聯必定會使用戰略核武。其實以當年蘇聯既狀況，佢會用先發制人使用戰略核武既機會並唔高。因為蘇聯整個戰略核武庫既質量遠低於美國，佢既洲際飛彈命中率遠遠差於美國，基本上無法準確打擊美國既飛彈發射井，而蘇聯戰略核潛噪音亦太大，即使係北海及巴倫支海巡弋亦唔可以百份百保證唔會被美國擊沉。蘇聯既戰略核武因為規模上比美國大，令佢有好強既第一擊能力，但由於命中率低，所以蘇聯既第二次反擊能力實在明顯比美國弱，所以如果蘇聯夠膽全面開戰，雙方基本上肯定蘇聯無法承受美國既第二全面核打擊而亡國。雖然美國既損失一樣極其慘重，但亡國既應該會係蘇聯。蘇聯由史達林開始既每一代最高領導人都心知肚明呢一點，所以蘇聯從來唔敢全面開戰。
冷戰變熱戰既第三次世界大戰重點有兩個，第一係中歐及西歐爭奪戰，以及全球制海權之爭，而後一個戰場以北大西洋及西太平洋既海權之爭最重要，所以我會將呢兩個重點分開來講。
歐洲從來係蘇聯戰略核心中既核心，而蘇聯係中歐既戰略亦非常簡單，就係要整個華約武裝力量於中歐保持對北約地面部隊既壓倒性優勢。當時蘇聯既目標係全面開戰後要係兩星期內攻陷所有西歐國家既首都，而蘇軍係中歐經常維持既常備軍既規模及裝備的確令人震驚。蘇聯最高峰時有各類坦克十萬架，而最優秀既坦克係質量上比北約同期對手有過之而無不及。東德最前線既第八近衛集團軍永遠裝備蘇軍最先進既坦克，包括T-64及T-80。前者係1960年代已裝備115毫米滑鏜炮，自動裝彈機及彈道計算機。後者係蘇軍第一代使用燃氣輪機、複合裝甲及反應裝甲既坦克，支炮係威力極大既125亮米炮，亦有裝備炮射飛彈。同期對面既美國第七軍裝備既只係中規中矩既M-60，去到1980年代先裝備好少少既M1。但早期M1只有105毫米炮，要去到1980代末既冷戰最末期先至裝備趕得上蘇軍裝備既M1A1，而且呢樣野仲未計蘇軍其他無咁先進，但數量上有極大優勢既二線坦克，如T-72、T-62，甚至係T-55，仲未計可能係戰時可以極快開發及生產完成既T-90。呢個數據亦未計蘇軍巨量既火炮、自走炮、火箭炮、裝甲運兵車及戰術彈道導彈。
當時北約高層全部心照係只用常規武器既情況下根本無可能擊敗蘇聯陸軍，所以若全面開戰，美軍將會第一時間用戰術核武殲滅紅軍坦克集群。但佢地亦知道咁樣蘇軍亦會用戰術核武，亦有機會升級為使用戰略核武，所以其實北約本身都非常驚。
至於制海權既爭奪，兩強亦係不相伯仲之間，但可以話蘇聯有少少優勢。表面上蘇聯海軍唔夠美國強，但蘇聯最強時候有超過450艘潛艦，其中大部份係核潛艦。雖然一般來講蘇聯核潛艦既靜音性及其他性能比美國既差好多，但由於美國核潛艦數量少好多，所以即使美軍出盡力擊敗蘇聯潛艦部隊，但仍然會有大量蘇聯潛艦可以繼續作戰。而且，蘇聯後期發展既潛艦係質素上亦有優勢。雖然呢啲潛艦既靜音性仍然唔好，但其他性能就比較匪夷所思。蘇聯開發左一系列既鈦金屬外殼潛艦，如塞拉級(Sierra Class)、帕帕級(Papa Class)、麥克級(Mike Class)、阿爾發級(Alfa Class)等，潛深非常大，可以潛深達800米，甚至紀錄係1200米，而某啲型號既潛艦極速可達45節。而其他新型潛艦如基洛級(Kilo Class)及鯊魚級(Akula Class)既靜音性甚至拍得上美軍既標準。呢啲潛艦如果逃過美軍獵殺，就可以恣意攻擊美國商船隊及水面戰艦，長遠來講可以令美國缺乏資源而投降。當然以美國既地大物博及極強大既軍事力量，蘇聯無贏得咁容易，就算贏其實都只可以係極慘勝，但蘇聯的確可以係世界各處海洋全面挑戰美國既制海權。
2014-08-31 01:35:52 補充：
如果蘇聯有咁勁，點解蘇聯唔開戰呢﹖當然首先係無人想打仗，但蘇聯最致命傷係經濟規模上完全落後於美國。如果開戰，兩國全面轉至戰時經濟，美軍明顯可以係更 快既時間內製造更多更先進既裝備，蘇聯係望塵莫及。
2014-08-31 01:36:02 補充：
而且，上述蘇聯可以挑戰美國制海權只係純粹於理論上講得通，要蘇聯可以全面生產上述最先進潛艦先有得 打，再加上美國海軍唔係死既，就算蘇聯海軍全面發展，亦未必可以真正壓過美國海軍全力發展。
2014-08-31 01:36:18 補充：
若美國仍可保留全球制海權，則以蘇聯比美國差得多既經濟，佢只 會更快崩潰。再加上蘇聯戰略核武既第二次打擊能力從來比美國差，兩樣野加埋，蘇軍係開戰初期最多只係中歐既陸軍佔絕對優勢，有較大機會係兩星期至一個月來 橫掃整個歐洲。
2014-08-31 01:36:31 補充：
不過，如果戰爭擴大至全球規模(呢個情況發生既機會極大)，而戰爭又維持超過兩星期，咁美軍係質素及經濟上既優勢將會愈來愈明顯，從而佔極大上風。
2014-08-31 01:36:55 補充：
至少，蘇聯係中歐發動總攻後，點搵足夠燃料及資源維持數以萬計戰甲車既裝甲洪流已經係一個無法解決既問題。而美軍亦可以動用全部力量摧毀整個較弱既蘇聯水面艦隊，係無水面艦隊既支援下，蘇聯潛艦能否繼續有效作戰係極大問題。另外，係冷戰末期，星球大戰計劃(Strategic Defense Initiative，簡稱SDI，中文通常譯為“戰略防禦機先”，星球大戰只係俗稱)如果開發成功，則蘇聯最核心既戰略支柱，即第一次戰略核打擊能力更會被全廢武功，令蘇聯更無信心發動戰爭。
2014-08-31 01:37:04 補充：
所以係現實中，蘇聯空有強大武力，但最終因無法解決戰略性缺點，令蘇聯唔敢發動戰爭。當然調番轉美國亦唔敢向表面上比自己更強大既蘇聯宣戰，但美國強得多既經濟及科技令佢最終可以壓垮蘇聯，係冷戰中生存下來。
