冇朋友對生活感到無趣乏味...

你好！以下我講既野可能唔係d咩好建議，不過我都想回應一下你。
我想講既就係，你絕不孤單！
因為我都係咁家，一樣係19歲，一樣係無朋友，不過我係女仔，唔打機。其實你已經好過我好多，因為你有一個朋友，有人會同你食飯傾計，一齊做自己鐘意既野，但係我就真係完全無啦，可能咁講好怪，但我的確係由細到大都無朋友，一直都無咩人同我講野，做所有野都係一個人……
所以我明白你既感受家，分組次次好似被人遺棄咁、永遠好似只有自己係咁、望住好多同歲既人生活得好開心覺得又自卑又孤單、人生好似無意義無目標、覺得自己唔會有將來、覺得人地會睇唔起自己……
我其實唔係好識去講d咩野去鼓勵你，講出黎都好似無咩說服力，因為我自己都有同樣的想法同樣的感受，但係我都希望你有好好既生活，唔怕老實講，而家我已經因為社交等既問題而要食藥睇醫生，依家都係日日向屋企逃避現實覺得無將來……
你既情況，我驚你再落去可能會日日隱蔽在家，或者真係絕望到自殺，我唔想有人好似我咁，相信你都唔想係咁，你係想改變既，唔係你就唔會上黎知識+問啦！所以既然你對自己以前既生活方式感到後悔，就將佢化成你改變既動力啦！(你已經好過好多人，有好多人就算日日浪費時間都唔覺有問題)有後悔既感覺就係你去改變既第一步。
其實打機可以係一個好既娛樂、減壓方式，但係你無理由一直就打機打到老，除左打機，其實仲可以搵下自己有無其他興趣，試下一d新既野都無壞…同埋你話覺得自己做野唔掂，覺得自己廢，或者介意人地既說話，我估都係因為同一個原因:對自己無信心。其實有d野，係真係『你覺得』家炸…我唔想講一d咩『比d自信啦』既說話，因為就算講左都唔會一時三刻有自信番，就好似我咁。不過想講既係，有d野真係要自己努力，要一直一直鼓勵自己。但當然，其實依個世界有好多人可以幫到你，亦有好多人會想幫你，好似依道回應你既人。同埋，日日係屋企，其實個世界都變得幾細(我自己係咁覺得～)，所以其實我會建議你搵社工，青協、夜貓果類上網都可以搵到，搵社工唔代表一定係有問題，就當係有多個人聽你傾訴下，同埋我相信佢地會幫到你，都可以擴闊下自己既世界，試多d唔同既野，我而家都有見緊社工，算係踏出第一步。
你都一樣啊，如果唔想以後既生活就係咁，你都要踏出第一步，搵番你既朋友又好，搵社工又好，總之搵個人黎幫下自己，嘗試下一d唔同既野，真係試下行一步，你就會有少少既改變。

如果你想搵人傾訴，都可以email我家:
[email protected]

睇到你最後用「後悔」呢個字做總結, 我估你應該好想可以改變而家的生活。
你可以諗下如果而家有機會俾你返轉頭, 你覺得自己應該點做呢???
到你諗到想點做, 你就而家開始做...其實都唔會太遲~
例如: 你話想識多D朋友, 咁咪而家開始; 你話想讀好D書, 咁咪再讀書...
你而家應該都好清楚「打機」令你有好多樂趣, 但同時你都失去左好多野...
之後的日子, 你可以諗清楚仲花唔花時間打機...
如果真係決定唔打機, 你可以去學一技之長,
例如好似搵工就做「學徒」, 廚師、汽車維修、剪頭髮、整甜品、化妝等等
其實好多都係一邊學, 一邊做,
你可以諗下之後的日子想點過, 再為自己訂立目標, 好好向目標邁進

呢一刻可能你覺得自己「唔夠人叻」
但你要記住每個人的優點都唔同, 俾D時間自己去發掘潛水
其實你都可以好叻!

希望你早日搵到方向! 加油!

你好。

睇到你所描述既生活，感覺係枯燥乏味，好似有好多唔如意既事、阻礙，呢D等等既野都一而再再而三咁打擊左自己既自信，甚至已經係覺得自卑，比人地遜色，而家既你一定感覺好辛苦、心入面好掙扎。

你提到自己冇野做就打機、冇咩朋友既問題，其實都可能同自己既目標有關係。自己不斷重複打機、乏味既生活，都幾令自己迷惘，究竟自己真正想做既事情係咩野呢，可能自己一時三刻都未諗到、未搵到，但係當有左一個目標，生活就會有一個明確的方向，通向比而家更精彩既世界。

上面既答覆其實幾空範，但係係呢到其實都好難可以盡數咁講曬所有既事，我地係小童群益會的夜貓大使，好歡迎你黎搵我地傾下計嫁。
facebook:nite cat
whatsapp:91703714

其實我覺得你最大問題係無朋友，同無做人目標。

你而家先十九歲，將來大把路你行，你而家覺得生活無趣，係而家嘅事，唔代表將來係咁，萬一將來你機緣巧合做咗一份你中意做嘅工，你就會後悔遲入行，又或你遇上你中意嘅人，又發現自己配唔起人，到時你又後悔而家的生活方式。

而且你之所以覺得生活無趣，係因為你搵到份你根本唔中意做嘅工，所以唯一解決辦法係諗清楚你最想做係咩工，或者最想做咩，最想學咩(諗唔到都一定要諗，你想唔想一世揹住後悔兩個字做人)。

至於人際關係方面，我只好贈你兩個字，隨緣。因為你細細個已經咁內向，要改變唔係一朝一夕嘅事。(唔係叫你唔變，出嘅做嘢，人際關係好重要)。老生常談講句，盡量開放自己，主動同人講多啲嘢，慢慢改變自己。