三年多的感情,男友變淡了,我卻放不下。怎樣,才能let go

其實都唔算係一個問題,係一個無答案既問題,打上黎,
算係想訴下苦啦

到底點先可以let go? 係咪要當佢後悔一刻我先會好過少少?
點解,一個咁專情既人,一個同佢講娶你既人,會心淡??

背景: 我同我男朋友都係專情類既人,兩個都金牛座,大家都係初戀
我地由中二起已經對對方有好感
中三開始拍拖,一直拍到中學畢業

岩岩起埋一齊個陣大家都覺得我地唔親,覺得我地好快會散
但係我地一拍就拍左好耐,都以結婚為前題
到大家都公認我地係會結婚,天荒地老既一對既時候,
我男朋友對我感覺淡左,而我都好清楚感覺得到
我提出分手,佢就覆我好多句,對唔住。
佢同我講唔係有第三者,我都相信佢

我地前後拍拖共兩次,第一次4個月左右,第二次三年多d
第一次拍拖我覺得佢唔係我理想既人,所以好快就無再同佢一齊
而當初佢好鐘意我,聽佢講當時佢日日都諗住我
--------------------------------
第二次拍拖之後,我地2個都好投入,出好多街去過好多地方
摸蜆啦踏單車草莓園迪欣湖科學館...,我地都認識哂對方既親戚,兩個人都會去探嬤嬤
雖然罵過好多次交,但係次次都會和好,基本上我都諗住係同呢個人行一世
我知道好多大個既人都會同我講我諗呢d係太早,但係我係真係對住呢個人一直都
無變淡過,我反而會形容到愈來愈愛,都比到我想要既安全感我。佢都同我講,要娶我,第日我地一齊生活買樓,生bb,有好穩定既家

佢都係好投入,會對我花好多心思,禮物果d都係handmade比我,一直以來都好好
有試過我半夜同佢嘈交,佢大老遠答的士3點幾來到我家,哄到我訓左才離開
有試過波羅特飲斷市,佢大老遠周圍搵m記,就係為左買2杯波羅特飲畀我飲
慢慢地佢會投放愈來愈多時間落朋友度,我都係; 但係我會覺得我地好穩陣
公開考試時身邊都好多情侶散左,而我同佢仲係日日通電話,我都自以為我地感情好不錯。 基本上認識我地既人,都對我地分開感到極驚訝

大概係由我地考完公開考試開始,我男朋友屋企間店就開張,
佢都變得比較忙,同我好少時間見面,以前每日訓前通電話講早抖既習慣都無埋
漸漸我發覺佢全日都唔再搵我 而且我生日佢都沒講生日快樂;周年都忘記左
其實你問我,我都知發生咩事既, 但係我接受唔到點解會淡,拍得愈耐,理應上唔係
應該愈來愈愛嗎?? 我去找佢,好自然拖佢隻手時佢縮,我都其實feel得到咩事


我知道好多人都話再見不能再是朋友 但我每一日都忍不住想同佢講句說話,即使佢睇到都唔理,應一兩個stickers都好。 我再不斷叫佢,佢問我「點解你要咁樣?」
其實點解我要咁樣? 因為我放唔底.....三年幾感情,佢變淡左緊係若無其事
但係對我黎講我仲可以話係熱戀緊,每望佢一眼都覺得好charm..

--------------------------------------------------------------

有其他人都係咁樣嗎?

我有試過轉移自己去做其他野,但係我既生活98%都同佢有關。我好難,去忘記佢。

我有諗過即刻接受第2個人,去拍拖 ; 咁樣想令佢後悔又有咩意思

我咁樣既狀態,要持續幾耐? 我應該等他回心轉意嗎?....

佢同我既對話中,好明顯對我有好重罪疚感(因為我一直以來都算做得好),
覆我一兩個字,一唔係就應我對唔住,再唔係就一個sticker

我其實係咪唔應該再搵佢?再搵只會令佢覺得我煩?