搵唔到工，好大壓力，點樣算好?

我而家放緊暑假，由5月中放到8月，我好想係呢段期間搵份工，
唔想晒左啲時間，但係由5月尾開始，我不停上網搵，腥左都差不多20份CV，
但係只有兩份補習叫我去見，但都衰左，其他連in嘅機會都冇，
之後去左啲招聘會到見左兩份，人地介紹又見左兩份，都係冇回音。

加上冇咩朋友，所以呢個幾月都差唔多日日屈係屋企，
呀爸呀媽見到我日日都係屋企，就係咁叫我去搵工，
又叫我多啲同朋友出去玩，果刻真係好唔開心，因為唔係我想屈係屋企，
係因為我搵唔到野做，朋友又唔多個，約親都唔去。

其實因為冇朋友呢個問題我唔開心左好多年，努力過去識人，
但識親都熟唔到，以為熟果啲，又發現人地唔係咁諗。
我都唔敢對朋友有咩希望，嘗試去一個人面對所有野，但久而久之，
我發現我開始唔識同人交流。

到左真係好唔開心果時，我唯有同屋企人傾訴，
點知佢地又成日捉住我冇朋友、搵唔到野做黎串我，好後悔同佢地講左，
好想喊，但又唔想比人見到，驚人地以為我有問題，所以好想自己一個人出去散心，
但因為我少出街，次次出去，屋企人就會問我去邊、同咩人去，
我有時唔想講，佢地就會話:「一個人都好出去。」，
我呀媽又用充滿希望神情望住我，又無端端同我講加油，我真係好無奈。

而家，我覺得我好容易發脾氣，到底我有咩係做得唔好，可以點做?
點先可以同人fd啲? 點先可以搵到工? 好攰......好無助.......到底可以點做.......