請問在PRICE網買冷氣機可靠嗎？

如果指名道姓去講一間公司,呢個係屬於嚴重指控,基本上要有證有據先得.

簡單黎講,如果要賣得比市面平,可以有幾方面入手,第一肯定係租金,第二係人工,第三係廣告,然後係貨源,係咪買斷型號,或者大手入貨,又或者係買入B貨出售.

咁又講番點解D人會去幫襯大型連鎖店,就係所謂有保障,因為佢地既商譽係有價值,做衰野去損害商譽係唔值得,亦唔需要用平價手段招徠,不過補充一點,大公司一樣會有人投訴.

而你既情況,自己盡量了解下點解會平過人地,而冷氣機通常涉及安裝,呢部份既收費又有冇研究清楚,或者了解下係咪真係有貨,因為我都可以標價300萬賣間貝沙灣比你,不過暫時未有貨.

2014-06-04 13:13:28 補充：
我比多個買冷氣機既意見等你參考下,通常一年四季入面,可以最平價錢買到冷氣係3,4月份,即係開季果時,原因係各大品牌都會出辦價,以一個較大折扣去吸引批發取貨,而批發又再以套餐形式(例如2匹+匹半+1匹+3/4匹)再提供優惠比零售商,成個流程就係講緊,大家都要散貨,去鎖定該年銷售額,所以當大家都食飽貨既時候,就有套現壓力,價格係會比5,6月時較平,而去到5,6月,假設某型號去貨唔理想,仍然會再平,但好賣既型號就會提價.

而去到冬天,通常會貴D,因為夏天已經散哂貨,而新一批貨可能係下一個年度,零售商如果冇存倉或資金壓力,都會唔憂賣.

2014-06-04 13:13:36 補充：
而作為一個普通消費者,假設花太多時間去所謂格價,其實交易成本係好重,亦有可能被騙,以10%咁上下既折扣去博,其實唔係太值得,因為一部質量好而又配合良好技術去安裝既冷氣機,用10年以上係冇問題,相反,平買左番黎,成日都有問題,經常維修都蝕哂,更重要係通常好熱果幾日先黎壞機,血都嘔埋.

2014-06-04 13:29:17 補充：
另外該網有好多間公司,首先我講明我係冇了解過該網係點運作,但我本能上既反應,就係其實佢自己或其他人開幾多間都得,亦冇人知係真定假.

我都可以係呢度開好多戶口.

現實情況黎講,好多不良經營既實體店鋪都可以用唔同經營商號去開好多店,分別只在於開實鋪既成本重好多.

最後我並唔係暗示任何野,只係講出我既睇法,呢個網可能真係薄利多銷,亦可能呃人又唔定,但始終做決定既權力係屬於你自己.