上市公司有什麼招數陷害散戶?如何炮製他們?

你講呢類問題,真係成本書都講唔哂.

比較經典既例子有電盈,股價由最高124蚊跌到而家得番幾蚊.亞里爸爸13蚊上市炒到40蚊,5年後就用原價再私有化.另外有數之不盡既民企做假數,或以高價收購個人資產,又或者係不斷合股供股配股將股價舞高弄低.

問題根源係股份制,主事人利益同公司利益係分開,冇得攪.

思捷其實又係130蚊跌到得番幾蚊果類,不過我又唔覺得屬於陷害散戶,因為根本只係佢地係批發與零售之間做錯決定,冇用財技去搵人笨.

咁散戶可以點做呢?任何情況下都應該分散投資,並且自己睇清楚公司盤數,因為好多大行報告或者公司業績都只係講出某部份真相.

財技1 股本重組 「抽水」伎倆易接火棒 「股本重組」係指公司會利用發行新股、配股或可換股債券（CB）以增加市場股數，據規定，發行新股嘅股價須高於股份票面值，所以公司通常會先透過合股以提高股價，之後再削減股本令票面值下降。 莉莉︰如果上市公司要「抽水」，會點樣決定集資形式？ SJ︰可換股債券係其中一個較快捷嘅集資伎倆，原本CB係好嘅融資工具，喺九五至九八年CB交易最為活躍，多數係由較難向銀行借錢嘅中小型公司採用，透過兩個股東直接交易，佢哋通常會揸到尾；但依家CB有少少變質，好多時交投並唔活躍，股東只好當股票嚟揸，呢三年會計制度改變，就少咗公司發CB。 莉莉︰背後會有乜嘢蠱惑招？ SJ︰市場上有公司會透過買CB持有公司控制權，佔有5%股權就要公布，但股東可以用CB拎到較大控制權，只要未將CB轉換，就冇人知你手握眾多股權，避過監管機構查詢。通常有收購就會發CB，當單一宗交易令公司發CB時，目的就值得懷疑，股民要知道背後邊個係揸住較大控制權，但呢樣唔係公開資訊。另外，若公司向基金發CB，但又向股民發股，股民要留意以免接火棒，所以始終用現金收購係最實在。 莉莉︰你個人揀細價股有乜嘢心得？ SJ︰優質細價股最好集中一項業務、公司經營咗幾年時間；最重要係派息政策，公司知道將盈利嘅幾多百分比拎出嚟回饋股東，派息唔需要高，每年股息率5%至6%已經好吸引。 放大圖片 財技2 借殼上市 箇中陰招炒高散貨 「借殼上市」即係透過收購已上市公司，獲得控制權及上市地位，或將公司部分業務注入殼公司，例如「體操王子」李寧入股嘅快意節能（08032）以及周星馳入主嘅比高集團（08220），分別「變身」為運動股及電影股。 高妹︰部分公司一年內配股4、5次，背後有乜嘢陰謀招？ SJ︰如果大股東買咗個殼公司返嚟未翻到身，佢就會不斷炒高散貨畀其他股民，叫唔同嘅「新股民」入局，大陸公司通常首先會邀請同鄉接貨，自己只係出細份錢；香港情況真係好得意，呢批「新股民」損手後，梗會有下一批「新股民」接貨。歷史一直重複遊戲，「今日嘅電盈，明日嘅乜乜」，大家要自己諗喇。 高妹︰散戶點樣跟風得嚟又轉到身？ SJ︰最離譜係見過有股東只用3個月時間買殼升值，再轉手畀其他大股東，抽完水即走人。散戶要清楚公司買殼成本以及批貨去咗邊啲人手上，先至好追入，仔細留意市場公告有時會發現蛛絲馬迹。 高妹︰名人入主殼公司，殼股變身後係咪可以起死回生？ SJ︰名人效應對上市公司嘅幫助只係非常短暫，以我嘅經驗，新項目超過九成都係失敗，所以公司未有任何項目確實前，散戶都唔好買貨住，即使確實後，都要計算對上市公司貢獻有幾多。 高妹︰殼股係咪多數都係呃錢收場？ SJ︰借殼上市唔係錯嘅事，中信泰富（00267）當年都係買殼上市，依家規模做到好大，每年都有派息。至於當年盈動入主得信佳，當時投行有宗旨，只會愈批愈高，得信佳由16仙升到2.4元，都覺得好神奇，之後股價再去到24元，我自己都開始信埋一份，凡事有兩方面睇，買盈動嘅散戶係輸咗錢，但管理層始終創立咗數碼港等，成就咗件大事。 後市點睇 續炒上落吼買新貨 莉莉︰喺依家市況買細價股抑或大藍籌較好？ SJ︰港股整體價錢合理，但唔覺得特別平，估計恒指今年都喺19,000至23,000點上落。投資大價股嘅盈利未來只會跟隨香港經濟步伐，難有三至四成甚至一倍嘅盈利增長。至於細價股，散戶睇唔通最好唔好玩。事實上，市場上有咁多新股及半新股，等市場冷靜後，股價變得合理，就值得散戶買入。