我既人生好像很灰暗

我出身於一個沒有愛的家庭, 我可以話得唔到任何support係我個家, 大家同住卻形同陌路, 甚至對我作出言語辱駡, 可能因為這樣, 從小就很少同人交心, 有咩事都唔會講, 唔似其他同學仔有媽咪, 嗲哋, 阿哥家姐撐, 我見到人地父母好慈祥, 成日同啲仔女傾計, 我個心就會la住la住, 呢幾日我朋友叫我陪佢買母親節禮物, 我個心又la住, 呢啲野我平時都唔會同人講。

d人成日話出身係沒有愛既家庭性格多是怪怪的, 的確我都覺得自已好奇怪, 雖然我外表好正常, 初初啲人都會主動撩我, 但我就成日避佢地, 板起塊面, 好cool咁, 我由細到大人緣都唔好, 永遠班入面最後無人同組梗有我份, 以前都比人恰過, 選左我做不受歡迎人物, 可能因為我怪吧, 又唔同人溝通, 好似個怪咖...我總係無令人喜歡既特質, 可能我太孤僻, 見到人會緊張, 拘緊, 唔識好自然跟人相處, 因為由細到大都無得練, 我係好羨慕有big family, 我一去到多人場合就變到好畏縮, 完全唔識點應對, 呢個問題都影响我同人相處既模式, 我除左以前玩開2-3個朋友, 就無朋友, 同事關係好疏離, 我深知自己唔喜歡咁樣既人際模式, 但我就係用左呢個模式去對人, 佢地會覺得我好冷漠, 我係可以一日都無同同事講過一句野, 但我又好介意自己咁樣, 成日壓抑住攪到depressed, 工作中我竟然最重視人際關係, 但我偏偏攪唔好, 我剛剛辭工了, 因為同班同事關係好差, 已經唔識點去同佢地再一齊共事, 我都唔好意思再留落去, 我都好depressed, 但我知我去到邊解決唔到問題都係一樣, 所以我好逃避搵工, 我好想去旅行, 但我又諗到去到當地唔識同人打交道, 又好似係香港既自己咁孤僻, 我就感覺好挫敗, 我到底去旅行為左咩, 如果去到當地又係自已一個孤獨精, 咁其實同係香港有咩分別...人地去旅行會搵local交流, 體驗當地文化, 但我去到係又係自已一個, 諗到自已d性格就覺得好灰, 我好羨幕可以同人好好溝通既人, 佢地比我快樂好多, 見住公司啲同事大家都好融洽, 工作時間都會開心一點....

我真係覺得好灰, 我係女仔, 但我從來無比人寵比人鍚, 我好硬淨, 但其實我好累, 我慣左自已一個, 但其實我真係覺得好寂寞, 點解幸福從來無係我身上降落? 眼見啲朋友有男朋友/老公/家人寵, 我就咩事都自已摃上, 就連有咩開心/唔開心都係自已啃, 我知我自已有好多不足, 特別社交上, 但身邊總係無一個良師益友可以提點我, 我知道做人係應該靠自已, 但我真係完全唔知點去同人溝通, 我既世界好似只有我一個, 我可以話被逼變成而家既我, 因為我真係無人可以依靠...

打左咁多野, 好多謝你地睇哂, 我而家前路茫茫, 仲猶疑緊去唔去一趟旅行, 我仲未夠膽同屋企人講我辭左職, 佢地成日覺得我做野半桶水, 如果講左佢地又會話我了..