男友愛的是我還是動漫人物？

其實我都知道，因為一個動漫人物而呷醋，十分無聊。
我自己都鍾意動漫，我明白熱愛一個角色既心情。

但係，我知道，我係崇拜、欣賞動漫人物，我知道自己真正愛既係身邊既男友。
不過，我唔知男友同我既想法一唔一樣。其實，我一直都覺得我同佢睇法有d唔同。

佢係好鍾意某d動漫女性角色，特別係比較可愛既類型。
有時，佢會叫我扮下個d女角色講野、扮下佢地把聲咁，扮可愛。
什至，佢會叫我扮下女角色既表情，都係一d好可愛既表情。

其實，佢會唔會將佢心愛既動漫女角色，投射左落我身上？

老實講，我唔覺得自己可愛。我絕對唔係d嬌小、kawaii型既女性。出身於女校既我，屬於有話直說、敢做敢認，比較堅定、勇敢既類型。以前讀中學時，大家都係女性，我地玩呀、笑呀，都比較癲。講白d，即係有d男人婆囉。

我都覺得好奇妙，點解我呢種又唔可愛、唔溫柔既女性，佢都會同我一齊。諗番起，當初同佢慢慢熟，都係因為大家都會鍾意睇某d動漫。其實，佢都係因為d動漫而鍾意我姐？因為覺得岩傾，有話題，所以會同我一齊掛？

到左而家，我覺得自己有必要思考呢個問題。
將來，如果佢遇上另一個同樣喜歡動漫，同佢有話題，而外表比我更可愛既女性，咁到時佢又會點？
由始至終，佢鍾意既，係唔係佢心目中最可愛既動漫女角色？
我，只不過係一個岩傾既女性朋友。
講真，我係有唔開心。
唔知大家點睇？或者你地會認為我係白痴。