我已經唔知道我仲愛唔愛佢,應該分手嗎?

我同我男朋友一齊左年幾, 最初一齊都好開心輕鬆,就算見得少但佢抽到時間都會見或者黎我屋企過夜,每次見到佢都會有心跳既感覺,個陣仲會有"識到佢真係好喇"既感覺。
大概過左半年左右,因為佢覺得份工實在太辛苦所以辭左職。最初都會成日傾好耐既電話,但話題始終會有少既一日,我地開始由日日傾個幾鐘,變成半個鐘,再變幾個字,然後變成幾日一個電話。陪我都時間都一樣, 因為冇工做時間多左但收入係零,基本上要錢既活動都係我比錢, 其實要我比錢我唔覺得係問題,只要佢係身邊我真係冇所謂......但問題係佢雖然冇工返但陪係我身邊既時間就少左好多....黎我屋企過夜就簡直少之又少...我試過喊住留佢佢都唔肯一手就甩開我。上年中秋仲試過因為佢應承我黎同我屋企人食飯(我冇逼佢)但最後因為心情唔好冇黎到,最後仲鬧返我轉頭,個次我頂唔順同佢講分手, 但過左幾日佢冇講d咩特別既野tum返我只係話唔想分開,我亦都唔捨得所以同返佢一齊....
屋企人亦開始多說話,成日問我佢有工返未,佢咁樣養我唔起之類既說話,仲有一次仲話我cheap....我真係好傷心.....但我都開始對佢愈來愈冇信心喇....見得少唔在講,遲到既問題更加不在話下....有時明明約左但因為佢訓到唔知時間咁就嘥左一日。成日都話好攰,但冇工返又唔搵工日日係屋企hea我真係唔知有d咩事令佢咁攰。
到而家我見到佢只會有心口有舊大石壓住既感覺。我覺得好辛苦,開始控制唔到自己既情緒,喊得好密,甚至喊到佢覺得我好煩....
我唔知我仲愛唔愛佢,亦唔知應唔應該分手, 我只係知我唔想由我傷害到佢....我可以點做?