因為冇同3hk續約，喺冇通知o既情況下被收取額外費用

件事係咁o既，我用左3HK都大約有６～７年前，大約一年前又續左一次約，無限上網(對速度冇乜要求，所以唔記得)，每個收費$59。大概喺2013年12月o既時候，佢地有人打黎同我講話我個合約就快到期，話想搵我續返個約，咁我就話想考慮下先，佢就同我講如果唔續會冇左個優惠，咁我都係堅持要考慮，佢就話會再聯絡我。

我考慮過之後決定唔續約，於是就冇再接過佢電話，之後間中都有收到sms，內容係話曾經嘗試聯絡我但唔成功，歡迎我致電xxxxxxxx查詢續約優惠。因為我都唔打算續約，當然冇打去查詢。

到左2014年2月頭o既時候，收到個賬單係$9xx，我打去問點解會收咁貴，職員o既回覆係話我個合約喺2014年1月4日已經到期，因為我冇同佢地續約，所以冇優惠，用幾多就收幾多，咁我就問點解合約期過左都唔通知個客，由得個客繼續用，佢就話之前已經有同事聯盟過我，話就到期，但我冇比明確o既答覆。我話佢個同事打黎都只係話「就到期」，根本冇明確講過係幾時，就算打比我冇人接電話，至少都應該有個短訊提一提，但合約到左期我完全都冇收過任何通知。佢話我應該自己記住幾時到期，佢地冇責任要通知我。我就話我冇同佢續約，都已經好明顯係唔用佢個服務，點解仲會假設我只係唔要合續，但仲會繼續用，而喺合約已經到期o既情況之下唔通知個客，繼續提供服務比佢，然後收成$9xx一個月。佢回覆都係話如果唔續約就會有另一個收價，呢啲應該喺我上一次續約o既時候已經知道。我就話冇印象有講過，佢就回覆話要比經理了解過再回覆我。

過左一個星期，佢地有人覆返我，就話了解過之後都係冇辦法比到任何折扣我，因為已經出左賬單冇得改，堅持要收足$9xx。爭論左一輪，佢都係話之前已經有同事聯絡過我，至於合續幾時到期佢地冇責任通知我，我應該自己記住，而唔繼約之後點樣收費我自己喺一年前同佢續約嗰陣都應該已經知道，最後我都係hold住左未做任何決定。

講真，我唔係話要走數，但原本已經有無限上網，只係收$59一個月，而家變左$9xx我覺得真係好唔合理。佢乜都話我自己應該知，我作為一個消費者點會喺一年前同你續約嗰一刻就要記住一年後幾時到期，到左期仲要主動返黎同你講唔用你個服務。佢地有職員睇住個system就話可以check到邊個客份約到期啫，但我作為一個消費者點會成日monitor住自己個約到期未。我好唔明白點解佢咁簡單連一個短訊都唔send黎通知我合約已經到期，廣告又識send短訊黎，偏偏最最最重要嗰樣資訊就唔send黎。

雖然話就話合約有話(或者可能有講)，但我覺得佢地咁o既方法就好似係博個客唔記得幾時到期，佢地又特登唔通知個客幾時到期，仲要繼續由得佢用，等到一個月後出左賬單個客先知咩事，仲要話出左單冇得改。

我想知有冇人有過類似經驗，仲有冇得同佢bargain，消委會同通訊事務管理局我都問過，仲始終3hk有啲合約條款保護，就算投訴都應該好麻煩。同埋去到4/3就截數，如果到時都搵佢續約又會收貴好多...