20點...處理問題同思考後果既方法

首先其實無具體事例，係難以知道你邊度出咗問題，
究竟你所處理既係學術上既問題，定還是係日常處理既問題呢？
因為唔同類型既問題要處理既方法都唔同，思維方式亦可能有分別，
所以先會有所謂既高分低能現象，又或者係讀唔成書但出黎好易做野既人。

當然，一個人處理問題機唔機智，真係同天資有啲關係，
個人醒目啲，轉數快啲，諗野諗得深而廣，會較易解決問題，
但呢個先決條件唔係必然，而你缺乏既或者係歷練。

其實處理問題有時係要靠經驗，呢啲野係要試！而唔係靠睇書可以學到！
老土啲講句讀萬卷書不如行萬里路，你讀幾多就只會input幾多，
但你真正試真正去做，先會學到更多！
我估計你係一個做事一板一眼既人，遇到問題唔能夠諗得闊而容易觸礁，
同時缺乏人生經驗，令到自己處理問題時唔能夠考慮周到，
最直接要解決呢個問題既方法就係提早接觸社會，例如去搵份part time做下，
見下世面，你先可以慢慢學識處理一啲係人都解決到既問題。
而當中係難免會有撞板既機會，但你要知道咁係必然既，
更加唔可以因為咁而怕咗，愈怕就愈避重就輕學唔到野！
講真，呢個係個幾work既方法，但你要犧牲下你既時間，
你要知道，有啲野係學校係學唔到架！
再唔係，你嘗試搵一個好harsh好多要求既人跟佢做事，
唔係玩你，幫呢啲人處理事務雖然會壓力大，但係你能夠從中學醒啲！

你可能會覺得好辛苦，但係唔辛苦又點可以成功呢？
唔係下下都有折徑可以走，特別係經驗，一定要試過錯過，個人先練得醒。

其實你而家仲讀梗書，仲後生，除咗以上既方法之外，
就係要多啲問，係，無錯，就係要多問，
究竟你係真係試過問過而人地又怕hurt到你唔答定還是你既自尊心問題？
而家就係好多後生都係有唔明又唔問，怕人唔知點諗點諗，
咁咪出事囉！事實係你真係唔識，呢樣野要認，
襯你仲讀梗書，仲後生，做錯，人地係會俾機會你，
你自己都知唔改會好大鑊，你都唔想將來又唔識又盛咁，
到你大個，一個唔應該再蠢下蠢下既年紀輕先想改就太遲啦！

真心想幫你，因為我自己都曾經係咁既人，
努力咁去改，亦都撞過板，錯過蠢問題，睇過唔少講腦力思維既書，
但係睇書真係無用，因為你學識咁諗野唔代表識做，
重點係要實踐！
如果你覺得唔岩聽，真係唔知仲可以點幫到你。

2014-02-10 23:14:41 補充：
就咁睇你既問題係冇交帶，做任何決定前，冇知會有關受影響既tutor，
可能你會覺得中間呢十分鐘break出一出去tutorial可能好快，最多咪遲5分鐘，
但個問題唔係遲到果度，如果係當時堂上正係做緊一啲重要野既時候，
而因為冇知會過擅自做決定，有機會會影響其他人，例如程序等等
事先講明亦都係一種尊重，如果你有合理理由，tutor係無理由詐你型既
（估計你應該係大專生？如果係既話，tutor一般都會明白事理，處事亦唔會似中小學嚴謹）
我唔了解你上堂既情況，亦唔清楚你tutor既為人，
但做人做事，有交帶係好重要，最緊要要講要問。

2014-02-10 23:27:56 補充：
我亦曾經遇過同樣問題，自己諗過度過，就係冇諗到人地，
冇事前通知，結果要人地放低晒啲野黎等自己，完全冇諗過會影響到人，
而你所講既驚佢驚佢點諗只不過係一種多餘既擔心，
你要考慮到既係你呢個做法會唔會影響其他人既安排或者程序，
仲有，以後有唔明就問啦！唔係蝕底係自己！
問問題唔係蠢，如果第日你要處理到同法律相關既問題，
唔明白又唔問，等人地下下大你，或者瞞騙你，
咁到時就真係蠢啦！

2014-02-12 13:34:27 補充：
咁你係學校有冇啲類似行政類型既事務可以做？
又或者班務可以負責？但始終學校同出面唔同，出去做野先真正可以學習到處事的技巧，
同埋你想改善，時間係一定要付出，因為你而家係要將一樣野變成習慣！
可能你而家真係太忙，咁你就要取捨，到底你想而家接觸定個社會，定繼續專注學業，
等畢業時先慢慢學，其實無所謂既，睇你自己意願啫，但世事好難兩全其美。

處理問題同思考後果既方法?根本冇特定方法: 因件件事都吾一樣 , 過程都吾同### 但要將心比己就OK 2) 諗左兩個方法先, 之後比較用邊個好3) 要同人商量 , 因各人會有吾同意見

天資問題, 有啲人到幾十歲, 思想都仲好似小孩子咁天真幼稚, 到你領得嘢多, 自然就會改進, 但有啲人領極嘢都唔會改變, 好講天生, 不過, 通常傻人有傻福, 或者另一方面, 你比別人優勝.

經一事長一智，你解決唔到問題，就無人會搵你，所以你不必自視過高，你可以解決只有你自身問題，例如食唔食飯，訓唔訓教，沖唔沖涼等等。