唔明點解咁多人都咁懷念讀書時代?

我讀中學小學果陣有成日比人欺凌,
完全係痛苦同黑暗既經歷,
呢D衰人仲經常帶動其他同學一齊集體欺凌我,
而同我曾經比較好傾既同學亦因為呢D衰人而疏遠我,
甚至出賣我/同我反面,
果陣一直過住以淚洗面既日子,
可以話叫破喉嚨都冇人知冇人理,
幾乎陷入抑鬱同精神崩潰既邊緣,
當時既感覺真係比死更難受,
可能唔多唔少因為咁搞到冇心機讀書,
成績亦搞到好差,
呢D感覺一直影響住我,
亦都一直走唔到呢個痛苦既漩渦,
亦因為唔多唔少呢個原因搞到唔敢去主動接觸新識既人,
亦唔敢再完全相信人同對人完全講真話,
因為好擔心再次受到傷害同被出賣,
開始唔敢再相信呢個世界有好人,
覺得大部份人都係膚淺,
甚至擔心連講一句說話都會好似中學/小學時代咁比人惡言相向,
我最擔心既人畢左業之後都好驚撞返佢地呢D衰人做同事,
實在好驚比人知道我有段咁黑暗既過去,
呢段黑暗既過去實在令我覺得好羞恥,
因為我相信大部份人都會睇唔起我呢類人,
甚至覺得我係自閉/弱智,
真係好擔心比人知道我有段咁黑暗既經歷之後會笑我同捨棄我,
亦擔心呢D衰人再次不停係其他新同事面前舊事重提同令所有新同事孤立我,
令所有新同事都因為D衰人既說話而當我係敵人,
搞到我係公司完全孤獨同自閉,
甚至因為聽左呢D衰人講既野而陷害我或者諗計令到我比人炒.
雖然我都有嘗試同自己講要主動識人同忘記過去,
但我仍然都係做唔到,
我真係唔想再咁落去,
好難得畢業後情況先開始好少少,
但係我依家讀IVE都係仍然識唔到朋友,
特別係分組做PROJECT果陣就好驚,
我真係唔想咁樣落去,
因為出黎做野係需要好既人際關係,
我真係好擔心因為咁搞到係職場既人際關係受阻,
我真係覺得自己搞到人際關係咁失敗完全係呢D衰人既責任!
真係想知呢D衰人點解冇報應!
覺得如果唔駛撞返呢D衰人做同事已經偷笑!
我真係唔明點解咁多人都話懷念中學既時代,
但我就絕對唔認同,
真係永遠都唔想再返到中學既時代,
對我黎講當時可以話係完全黑暗,
可以話冇野值得我留戀,
覺得自己畢到業仲生存緊已經係奇蹟.
比著其他人可能已經受唔住自殺,
我覺得講D咁既說話既人係完全未受過苦先咁講,
根本完全唔明白弱者既感受,
甚至將欺凌當係快樂既中學回憶,
到底D人可唔可以設身處地諗下!