政府工人工

新入職警員薪金為HKD19,545。高級警員(一柴)薪金當然會比新入職警員(無柴)高，但都同屬於員佐級警員3至19點薪酬範圍。只要該任職滿12年、18年、24年及30年而工作表現良好，可得到4個長期服務增薪點，即HKD28,725元至HKD31,265元。即係警員同高級警員頂薪點都一樣係HKD31,265。
剛入職消防同救護員起薪點都係HKD17,245， “一柴” 人工會比無柴高(相對剛入職消防員或救護員而言)，不過大家頂薪點都係HKD23,180 消防同警察唔同，警察的確係有一柴呢個職級，即係高級警員，可以係由警員升上去，亦可以係由警長降級。而消防同救護職級上並無“一柴” 呢個職級，消防員或救護員升一級就係隊目，即係兩柴。所謂“一柴” 只係代表呢位消防員或救護員任職已屆18年或以上，但又無升做隊目資格(一般做滿十年就可以去考隊目試，合格同表現良好就可以升兩柴。升唔到可能係考隊目試唔合格，表現一般或自己唔想考)。處方會比呢類服務年資高的消防或救護員一柴同加人工以作獎勵，所以一柴又叫安慰柴。
警察起薪點比消防員高，體能同視力要求又比消防低，所以會比較多人投考警察。不過消防處有個職級叫消防隊目(控制)，起薪點係HKD24,570，頂薪點係HKD31,540，比起一般消防員高好多，又不用視力同體能測試，係訓練學校畢業出嚟就係兩柴，唔同一般消防員要由無柴做起，又無乜危險性，所以每次招聘都會好多人投考，不過流動性低，競爭又好大，平均3000人爭10個位。

而消防隊目(行動)起薪點係HKD23,875，消防總隊目(行動)起薪點係HKD30,730，救護隊目同救護總隊目同上。

而督察薪金都係比消防隊長高，不過高級督察同高級消防隊長頂薪點一樣都係HKD69,245。而救護主任起薪點就比消防隊長低。