想知自己係唔係同性戀?

我睇過好多有關同性戀的網頁，但係都唔太確定自己係唔係。

我係女，家庭冇咩問題，同父母的關係都算唔錯，有講有笑。我有兩個好好既朋友(A同B)，同班之餘仲識左三年。其中，我同A最熟，因為同年。咁我地相稱兄弟啦，雖然我地兩個都係女。

我本身對同性戀、異性戀、雙性戀都冇咩感覺，都唔係話有咩特別感覺咁。就算自己讀基督教學校都唔止十年，自己都冇信過基督教，對於入面D反對同性戀既字句都絲毫不理。

係同班同學眼中，我同A最好朋友啦，事實上都係既。以前倒就冇咩野，但係呢年開始有D唔同。有個女同學(C)就突然同我地三個做朋友啦，而且佢經常同A一齊，佢地一齊既時間就快比得上我同A一齊既時間。我同A一直都差唔多一齊行動，一齊放學，有時會同B三個人一齊。三年來，所有考試同統測有98%都係三個人一齊食飯，佢地食，我睇。但係C入左來之後，C同A既稍為親密動作多左，姐係抱抱啦。事實上，A好反感同性之間稍為親密既動作，都好抗拒同C太接近。不過，我就發現同時我好似對佢有一種莫名其妙既獨佔慾，唔想比C掂到佢，我反而唔擔心B，因為B唔會做呢D野。企係A身邊，我會覺得好安心，甚至想一直係佢隔離，然後就會忍不住笑了笑。一直以來，我都好中意食完飯之後望住A食，當A望了我一眼，轉身之後，我自己就會望返前面，忍唔住笑了笑。我成日習慣咁幫佢拎埋飯，如果C幫佢拎左，我反面會有D唔開心。我中意睇佢畫畫，靜靜咁睇住，心裡已經好開心。如果我係A唔太察覺既情況之下摸左佢隻手一下，心入面都會偷笑。同佢講野既時候，會忍唔住偷望一下佢。有時候，佢數學唔識會問我，而我多數答到佢。當佢傳訊息比我，叫我教佢做既時候，我會好樂意咁做，但係其他人問就完全冇感覺。佢傳一D表情比我，就算係生氣又好，無奈又好，我都會笑住打返個回應比佢。直到呢幾個月啦，我會有種想同佢KISS既想法，但係又唔會做。

有時候，我會諗，我係唔係太同A係一齊呢，係唔係太著緊，但係又唔想有人比我同佢更友好。C依家成日同佢一齊，但係有時候C問佢幾句，佢先回一句，但係我講野，佢就一定會回應，即使我知道咁係因為我地識左三年，但係，心入面都係會忍唔住覺得真係好。或許係性格使然，我對佢既一切總係特別關心之餘都了解得比其他同學清楚，經常小心留意佢既心情，當佢心情唔好既時候，我會講下D冷笑話比佢知，或者比佢靜一靜。

我真正注意到自己有呢個傾向，係已經有一男兩女一時手快，係班群講我好LES(姐係好有女同性戀FEEL)，每次我都只係講係啊，然而加上一句講笑就算。於是，我開始搵有關同性戀網頁啦，好多都係講成年既女同性戀，但係我完全未成年......又話要有性幻想先算，但係我只係想KISS同抱抱而已。而且，我對男仔平日就冇咩感覺，但係傾太耐會唔自然，有D唔自在，有時候會注意一兩下，之後就冇野。我知道呢條路有幾難行，我都預左如果真係，就同父母講，父母反對，我大概都會堅持。

最後，我都係唔太清楚自己係唔係呢，畢竟我同A認識左有三年啦，一齊放學、一齊吃午飯、有時一齊返學、一齊打機，一齊做功課......對吧?

希望有人答到我，無論答案點樣，我都會接受。