今年12月底至1月頭十幾日旅行去邊好? 一個人意大利好不好?

去意大利梗係好，不過一個人就要小心D，因為意大利出名小偷扒手比較多，不過當年小弟去既時候比較好彩，完全無撞到麻煩事，整個行程非常順利，以下係我少少行程推介﹕

我建議照以下既次序搭火車去嗰幾個城市﹕羅馬 > 佛羅倫斯 > 比薩(由佛羅倫斯來回) > 威尼斯 > 米蘭。唔係一定要咁行，但呢個次序係將上述幾個城市由南至北順序排列，照咁行應該會順啲。而且小弟當時就係咁行，完全無問題。去比薩通常由佛羅倫斯出發並係同日來回，因為比薩除左斜塔之外真係無野睇，所以睇完後即刻可以走。

我覺得羅馬西玩四日三夜，佛羅倫斯都係最多三日兩夜就夠，我先介紹羅馬。

羅馬可以去既景點好多，但首先一定要去梵蒂岡。梵蒂岡話名係一個國家，但其實佢只係羅馬城內一個山頭，搭地鐵去就得。聖城大致可以分為兩部份，即聖彼得大教堂加聖彼得廣場及梵蒂岡博物館。教堂同廣場都唔駛收入場費，入去最主要係見識兩地既宏偉同精雕細琢。最需要詳細留意既有位於教堂正中央既聖體傘。而係教堂入口右側處既聖殤像亦係重點。


梵蒂岡博物館有好多野睇，不過要留意既得幾個地方。第一重要既就緊係西斯庭教堂(Sistine Chapel)天花既壁畫，啲畫無論色彩、構圖同立體感都一流，令你好似活生生經歷左一次創世紀之旅。米開蘭基羅勁到你有時唔知牆上面既究竟係雕像定係畫，我有唔少部份都要睇左勁耐先至說服到自己嗰啲係畫而唔係雕像。

去完聖城，應該去鬥獸場。呢個建築物雖然好宏偉，但其實唔算太精彩，畢竟有成二千年歷史，殘啲都好正常。鬥獸場既飛係連埋可以入羅馬廢墟既，坦白講，嗰度都唔係幾好睇，除左一啲希臘式石柱較為可觀之外，都無咩好睇，樓主唔駛嘥太多時間。

之後一定要去萬神殿。萬神殿最巴閉係佢既跨拱係19世紀中期之前係全世界最闊，就算依家入去你都會覺得極為壯觀，你會驚訝點解二千年前既人會造到啲咁既野。仲有，呢度係名畫家拉斐爾(Raphael，頭先介紹嗰幅“雅典學院”既作者)，佢係死後百幾年被遷葬至此，係入口左邊遠處，呢個係對佢藝術成就既致敬。

之後順路一定要去許願池。呢個景點極靚，所以幾時都咁多人。去到梗係要許番個願，傳聞話要背池，然後將銀仔用手拋過另一邊膊頭先至靈。不過無論點都好，呢到真係靚到絕，樓主可以係度抖下。

然後有氣力既可以去埋西班牙樓睇。條樓睇好靚好宏偉，通向山上一間教堂，不過反而間教堂唔係幾靚。樓睇前既沉船噴泉係貝尼尼爸爸既作品，佢見嗰度水壓低，水噴得唔高，所以靈機一觸就唸到雕一隻漏緊水既船。

講完羅馬，要講下佛羅倫斯。呢個城好多野睇，剩係市中心百花聖母大教堂(Santa Maria del Fiore ，即係成日見到嗰個大圓頂教堂)同隔離其他景點，好似喬托鐘塔、聖十字教堂都有排你睇。

上完個頂，你可以去番教堂正門排隊入番教堂，今次唔駛錢。之後你可以行落去烏菲茲(Uffizi)博物館睇名畫。入去其實主要係睇波提且利(Botticelli)既名畫，包括“維納斯的誕生”及“春”，兩幅畫都係非常當眼既位置，而且你見過都會覺得兩幅畫無論取材、構圖同畫功都一流。

之後就要去藝術學院博物館(Galleria dell' Accademia)睇大衛像。雖然有個複製品係烏菲茲出面既廣場，但當然係睇真野好啲。呢個像就真係無得頂，因為佢真係好似一個人中左魔法變成雕像咁神似，如果唔係純白既外表，你真係會以為佢係真人。但純白既材質加埋完美既線條令佢有一種崇高既靈氣，絕對值得樓主花多啲時間好細緻咁欣賞佢。

威尼斯去1日就夠。威尼斯無咩睇，最正既野都集中係聖馬可廣場上，參觀完個教堂及係廣場上行下，睇埋附近既嘆息橋就夠。至於水道，樓主當然可以坐下Gondola，又或者好似小弟咁，先係岸邊羅馬廣場搭船去聖馬可廣場先，然後由聖馬可廣場行番去羅馬廣場黎參觀威尼斯既城市面貌。有人會係威尼斯留多日，去外島參觀玻璃廠，小弟無去到，但據聞幾正，樓主可以唸唸。
米蘭一樣無咩睇，大部份人去都係為左買名牌，如果講景點，就只有米蘭大教堂可以睇下。但據我所知呢個教堂其實比較平庸，藝術價值雖然高，但觀賞價值就不及其他三大城既教堂，所以樓主真係要唸清楚好唔好去。或去睇必需要一年前預約既《最後的晚餐》，值唔值得就視乎樓主點唸。

意大利國鐵訂票好方便，上佢地個網申請一個戶口就可以係網上訂齊所有車票。
意大利國鐵網址﹕
http://www.trenitalia.com/

羅馬同佛羅倫斯博物館訂飛網﹕

http://www.rome-museum.com/

Good, Italy is a good choice. But I suggest you to join the tour instead of alone. Because the it is not very safe in Italy.