請問點先可以冇咁呆？

因為屋企搬左去好遠所以轉左校

我覺得我好慘，之前喺果間學校果陣，啲人都知我係呆，都接納左我，

就算有啲人係當我傻既，我都覺得冇咩野，因為其實佢地都係好關心我既。

但係自從轉左校，

啲老師成日叫我專心啲啦唔好發夢啦，仲成日問我岩岩教到邊，我亦都答得到，

可能就係因為咁，啲老師唔順氣就成日針對我，叫我唔好發咁多夢，

仲問「發緊啲咩夢呀？不如分享黎聽下？」，

之後成班喺度笑，我個心真係好唔舒服。

其實我啲成績好過班上好多同學，都唔知點解佢地要咁。


上體育堂果陣時，踢波，我就成場得個跑，啲人以為我發緊夢黎踢波，所以冇人敢傳俾我。

打籃球又係咁，成場企喺度。

除左踢波果陣食過一次波餅之外，我都冇掂過個波。

有時去廁所，啲同學都會笑住咁同我講「咪掛住發夢啦柯左啲尿先啦」，

我都唔明點解入左學校一個月，就成為全級既風雲人物，我真係有啲頂唔住。

我試過用左成千蚊黎買咩眼部既亮眼液，仲買埋con，

我有日帶住con返學，點知俾成班人笑到面黃，我覺得好頂唔順仲早退埋。

行緊街果陣，有啲人係咁望住我不特止，

我有時喺倒後鏡仲會見到有啲人行過左之後擰轉面再望下我。

出街食飯果陣，啲侍應好似特別關心我咁，我真係好想講「我係呆，但我唔係傻架」

我有問過一啲朋友，佢地話我呆到好似條死屍咁，好似冇左靈魂咁。

我想冇咁呆，到底有咩辦法？


之前我朋友叫我不如去打下拳，話應該會精神啲，

不過真係太辛苦，我打左兩個禮拜，都係冇咩改善，而且又太辛苦，所以都係走左。

不過有樣開心既野就係，

個師夫同我講「不如你唔好走啦，我地完全捉唔到你路，留喺度打啦，你將來一定可以大展拳腳」，

咁我係咪真係應該留喺度打拳？

但我真係想讀好書搵份好工，個師夫又同我講「你呆到咁，邊個老細敢請你呀？」。

我真係諗唔明，一個人成唔成功，係睇佢有冇才能，關呆唔呆乜x野事呀！


有啲朋友叫我唔好咁介懷人地點睇，但其實我自己都唔想，

但佢地唔係呆，都唔會明我咩感受，

我就好似一個笑星咁，行到邊都會見到有人笑一笑，笑緊咩呀分享下，笑緊你囉。

講就講話唔介懷姐，但係咪真係講完叫自己唔好介懷就真係可以唔介懷？就真係可以當冇事咩？