蛀牙及橫生的智慧牙

你地好，小弟早排牙痛，去了牙醫度睇，個牙醫話我有隻智慧齒打横生頂爛前面隻大牙，說要兩隻都要剝，咁我話剝左隻大牙我點食野，佢話造返隻牙落去，仲話另一邊有隻大牙蛀左要補牙，我問佢加埋要幾錢，佢之後遂個價同我講，加加埋埋都成萬五左右，呢個價錢係我成份糧啦，聽完個價後我走人。

之後我去左黄大仙嗇色園牙科診所預約
睇，個醫生幫我檢查完同我講隻智慧齒打横生打住前面隻牙，同另一邊有大牙蛀緊，叫我照X光，個醫生幫我照完X光，拿住張X光片佢話隻智慧齒打横生，有點到神經線，前面隻大牙比佢頂爛左，做法就係（1）拔智慧齒同前面果隻（2）導牙根鑲牙套

（1）拔隻智慧齒比較復習，因打横生同點到神經線，是有危險的手術。
（2）導牙根是精細手術。

佢話呢兩個手術呢度做唔到，叫我找專科搞，佢比左個網址我，找有（口腔頜面外科）專科的牙醫幫我搞，我 問佢有冇介紹信，佢話冇介紹信寫（本來諗住黎嗇色園會平D，點知話無得搞，吹脹）

咁我就返到屋企上網揾，揾到明愛醫院有呢個專科睇，即刻去左明愛度睇，點知去到登記處，個接待員同我講話要介紹信先可以睇，我聽到之後又火滾又灰晒，好無奈咁離開。

之後响醫院附近見到間寫住（口腔顎面外科證書）的牙科診所，入左去睇，咁就同e個醫生講之前的經過，佢幫我睇左之後話D牙好多牙石，再同我照X光，佢話有兩個方法：
1：拔智慧牙，隻第七隻牙導牙根
2：拔第七隻牙，先在虎牙骨打粒釘再用局部箍牙拉隻智慧牙到第七隻牙的位置。

之後我問佢如果導牙根隻牙係埋用唔耐，佢話不一定，有D人幾年，有D人十年都無事，再唔係可以用第二個方法拉牙，因為隻智慧齒無蛀到，不過時間長，要九個月，但唔包成功，如果拉唔到，最终要剝左隻智慧齒，佢見我聽完還未決定叫我諗清楚先再決定，然後佢報個價我知，叫我先約時間下次黎整，
第1方法加埋要$6xxx
第2方法加埋要$14xxx
然後我出去約個時間就離開，一天走咁多地方揾牙醫，真係人都瘋了，返了家休息，隻牙又不定時的無啦啦的痛了起来，扯到頭都痛埋，好在家有雙飛人藥水，沾D藥水响棉花度塞住佢可止下痛，起碼可訓下覺，返工都帶定支藥水同棉花，這治標方法都用左幾日，之後果止痛時間越本越短，試過凌晨三點痛醒左，換過棉花再塞然後再訓，返工都一日換幾次棉花，這種痛簡直是折磨，之後決定用第2個方法，心諗價錢雖然貴D，但起碼有真牙用，等到放假即去剝第七隻大牙，佢幫我剝完牙後，佢同我講，話好彩我决定剝左隻牙，隻牙根是C型牙腳，好難導牙根架，叫我再約時間洗牙。
之後我出左去比錢攞藥，但只比左必理痛止痛藥，我問個姑娘乜無消炎藥咩，佢話醫生只開止痛藥，隻牙剝左就唔會發炎，唔使消炎藥如果有痛就食，無痛就無食。之後第日返工有同事問我好D未？我同個同事講返，佢話正常都有消炎止痛兩隻藥比喎，我自己都感到個位有D腫同小痛，於是去藥房配藥。我開始懷疑個牙醫手野得唔得！！！
到了洗牙果日，入到去裡面，佢話準備洗牙，但奇怪的唔係醫生佢幫我洗牙，而係兩個診所姑娘同我洗牙，個牙醫就响電腦枱個位度，兩個診所姑娘一個揸住支吸水管，一個揸住唔知咩黎個頭好似钓魚用的倒匀尖尖地咁，跟住開著D儀器，發出D聲好尖下，開始洗了，個過程好痛，好恐怖下，好似有針插入啲牙，仲有D磨野聲，洗到中途，個醫生話，點解支野咁嘅聲，換個支啦，之後換左支好似倒勾果支，開著支野D聲比前一支更大聲，我就慘了，比之前更痛更難受，個醫生跟住説：呢支好好多，D聲都唔同，D儀器有問題妳哋都唔知，聽D聲都知啦，妳哋要識分先得架！

我心諗醫生你唔係專業咩，D聲唔同而家先黎講

佢哋繼續同我洗，有D位又再洗過，過多一陣洗完，之後我問個醫生我另一邊係咪蛀左，因為我黎呢度之前有睇過另一間，佢跟住幫我睇，話無蛀到，只係D牙有D黄，同入面隻智慧齒(另一邊)睇下你剝唔剝，之後佢話搞掂架啦，出去再約個時間拉埋隻智慧齒啦，。

跟住我出左去，約幾分鐘後，姑娘同我約時間，同我講醫生話D牙洗得唔係幾乾浄，約個時間洗多次，咁今次洗牙，D牙會好敏感，然後比左支抗敏牙膏和牙縫刷我

黎完呢次後，我决定唔再黎，有3個原因令我越黎越懷疑個牙醫，…

1:幫我剝左第七隻牙點解唔開消炎藥比我

2:洗牙點解唔係佢幫我洗，仲要D儀器有D問題，最覺得唔妥的是我覺得係比D姑娘响度實習咁

3:前兩個醫生話另外一邊有蛀牙佢話無蛀，因為未洗牙前我飲親凍野另一邊某個位都感到唔同，特別係感到凍D……

~~~~~~~~~~~~~~~~~~~~~~~~~~
所以我想問各位有無牙醫好介绍

知唔知智慧齒係咪可以拉出黎架？

因為我近排都有上網睇過拉牙的個案，但唔知揾咩牙醫同我搞，

另外想知植牙要幾錢？

唔該咁多位..........謝謝