有冇人為我地既細蚊仔著想？

「中學生人口下降，教育局要求學校縮班解決生源不足問題，加上局方今年起將陸續取消數項津貼，如主要用以聘請教學助理的通識科津貼，教協指除非學校動用儲備，否則未來兩年將有近900名教師或助理失飯碗。準教師入職無望，令教育界出現嚴重斷層。教協調查亦發現本港教師的授課時數冠絕中港澳台，要求當局增加常額教席。」

係咪因為教育學院無限量的制造教師，教師畢咗業，無風無險，就要用公帑來養他們一世？咁佢地有冇盡過做老師既責任，為小生命著想一下？

問題一再重復，出生率低就要縮人數小班教學，問題解決唔到就把上下午校分成２間學校，養多一倍老師？

究竟而家個教育系統係咪剩係為Ｄ老師著想？剩係顧住怇地飯碗而唔駛理Ｄ學生？

教師的授課時數冠絕中港澳台，就係因為轉咗做全日制，如果剩係教上午校或下午校，係咪會冇咁辛苦？

做家長既，見到幾歲既人仔，６點幾就上校車，放學返到屋企都四點幾，食小小野，沖涼和食飯，其他時間全部都要做功課，每日１０樣功課係正常的，中英數，　書一樣，練習一樣，習作紙又一樣，日日又要默書，間間學校又話要一生一體藝，個個又要學琴又要學游水，中英數普通話都要補習，究竟呢個係乜野世界，點解個世界對小生命咁殘酷？

為人師表的又冇責任，學生唔合格就要家長跟進，好充分利用家校合作，完全唔會諗下學生點解唔合格？完全唔會做番Ｄ野？

以前一班４０幾人都出咗好多叻人，而家每班得番一半人仲攪到有一半人唔合格？

如果要為教師飯碗著想，有冇人為我地既細蚊仔著想？