純綷想瞭解一下我一位朋友的心態

佢唔係我最好既朋友，但卻係最特別既朋友

多年前的故事了，當時初出黎社會做野，心智仍未成熟，公司請左一位新女同事幫我手，我地同職級，我一直好俾心機教佢，之後日日一齊食飯，放工等埋一齊走，無所不談，包括談論對方男女朋友既事，嗰時我的確對佢心存愛意，但雙方已各有另一半，所以雖然全公司既人都係度取笑我地係埋一齊，但實際上我地之間並冇開始過。但不久後，佢開始對我冷淡，仲發覺佢msn不時block左我。我初時問極佢都唔肯講發生乜事，但經我再三追問，佢語氣好差話唔想我地太親密惹人閒話。我初時認為大家一向傾心交談，只係感情上既問題，起初仲對佢死纏爛打，但我有一個網友竟然指出呢個女仔工於心計，當我係傻仔，當初需要我教佢野所以對我好，但到我冇利用價值時就一腳伸開我。我之前完全感情用事，但理智一想似乎不錯，一股傷感頓時化為憤怒，於是開始對佢大加設防，並開始反擊。我坐佢後面，我偷睇到佢msn同朋友取笑我，我更認定佢真係覺得我係傻仔，更加怒不可遏。就咁樣我地開始默不作聲，係公事文件來往上鬥個你死我活，不斷傷害大家既關係，我地由好友變成陌路人再一步惡化為敵人，就咁樣明爭暗鬥左幾個月，我地既關係可謂差無可差了。

點知到左平安夜嗰日，一件難以置信既事發生左，佢突然轉身，向我遞上一盒小禮物，語氣平和咁同我講左句「聖誕快樂！」，然後又轉身工作。我呆了，腦裏一片空白，完全想唔到佢究竟有何居心，唯一肯定既係心已經完全軟下來，默望住盒禮物，鍵盤上既手指停下了，一封封暗藏殺機既email無法再寫下去，而佢亦以乎再無惡意，我地既爭鬥奇蹟地一下子回復平靜。而呢盒咁神奇既小禮物，不過係朱古力餅之類既野，最後我一直唔捨得食，直到過期先丟。

往後更因公司有一公敵，我地兩個被大眾拉攏至同一陣線，我地係一次經歷中竟然互相出現渴望友好既眼神，於是把握時機交談，幾個月黎既隔膜一下子全消。後來我同佢講我將會轉工，我地更加變成無所不談既好朋友。同開始時唔同既係以前對佢有愛意，但經過漫長鬥爭後呢種感覺已經消耗殆盡，而家變成純綷既友情。只係覺得初初識佢時冇我想像中咁好，到後來又冇我想像中咁差。往後幾年我同佢都拖住另一半係街度撞到，更加好似老朋友咁打招呼，直到大家都結婚了，大家仍然保持聯絡，facebook、whatsapp、draw something，我所有要求佢無所不應。回想起來，好多地方我到而家都百思不得其解，雖然以我地而家既關係我直接問佢佢都應該會答我，但咁問又好似好唐突好奇怪，大家有冇人可以嘗試去瞭解一下佢對我既態度點解會出現咁劇劇性既轉變呢？我個網友對佢既評語又好似啱唔晒，究竟大家覺得佢點呢？

（我係呢件事用既絕對唔係正確人際關係處理方法，最後得到美滿結果可謂萬中無一，大家千祈唔好學）