同女同事既關係突然180度扭轉

同公司一位女同事共事左幾個月，佢性格剛烈，口直心快，冇拍拖。一直以黎被大家安排我地兩個一齊做野，慢慢熟絡，覺得佢幾熱情，有時佢會一邊做野一邊係我旁邊哼歌，放工亦幾乎每日都同佢一齊行去巴士站，whatsapp亦越黎越多野講。有次同佢咁啱搭同一班車，近一個鐘既車程我地坐埋一齊玩同一部手機，不斷掂到大家既手，全程逗到佢嘻嘻哈哈咁笑，呢一刻我真心覺得我地好似一對熱戀中既情侶。往後既whatsapp越加甜蜜，有時佢甚至會向我撒嬌，最令我心動既係佢竟然send左個「吻」既符號俾我，不過我覺得佢可能係玩下，所以繼續同佢一如以往溝通。佢同我講過佢就黎生日，不過死都唔肯講係邊日，佢份人其實都算簡單，某程度上我可能比佢更細心，最後都俾我輕易估中佢生日，而我更非常幸運咁撞中佢幾多歲，佢都好驚訝我點解會知佢年紀。佢今年係唯一一年生日請唔到假，我就咁變左陪伴佢過生日既人，但可惜生日禮物既製造技術上出現問題，生日當日我送唔到禮物俾佢，要第二日先送到。當時我都好擔心佢收到禮物會有乜反應，但見佢望住我送俾佢既公仔，溫柔咁撫摸佢，笑得好甜，我真係喜出望外，但我好清楚我地係冇可能係埋一齊既，佢亦都清楚。我亦覺得適可而止了，所以往後除左繼續傾偈whatsapp外，我唔敢有任何更進一步既行動。但大約一個星期後開始越黎越少野講了，甚至覺得佢有啲唔想睬我，之後佢話另一位同事成日一個人做野好慘，要我同個同事一齊，佢自己就快步走開一個人做野。我心如刀割，第二日刻意放慢腳步等佢同個位同事一齊，快佢一步避開佢，但我係佢背後見住佢四圍望搵我係邊，最後佢終於發現遠遠企係佢後面既我，向我回頭一笑，我個刻又有點心軟。之後既日子我地又變返繼續兩個一齊做野，但我覺得同佢既關係已經變左質，越黎越冇野講，whatsapp除左公事外亦冇乜閒話了。以往返工前會約埋一齊食飯，但之後佢唔肯再提早出門同我食了。跟住佢去左旅行，我亦可暫時放低佢，鬆一口氣。佢返黎第一日係咁同我傾佢旅行既事，以為可以開心返一日，點知放工後我又咁啱同佢搭同一班車，但上車後佢第一時間拎起耳筒聽音樂，完全唔俾機會我同佢講一句說話。同一班車，同一座位，相隔個半月後變成只能係佢身邊自討沒趣咁玩手機。回頭細想，我實在諗唔到任何得罪佢既地方，點解佢會無故變得咁冷漠？係咪對我產生左厭惡？而家要成日同一個冷漠既人一齊都幾辛苦，想刻意避開佢但又會令人覺得古怪，我可以點做呢？