點解油麻地，跑馬地，新填地街，大笪地既地字會讀左高音

廣東話共有九音之多，而陽聲音調低，很多時如尾字字音太低，很多時會提高一點。可以話順口，不提高反而覺得不自然。
例如你提出的油麻地、跑馬地、大笪地都是。
新填地街則未必，因為不是尾字，也有不少人讀原音。
同理，你其他例子中『地』字在中央，變成非重點，堅尼地城等，城才是重點，屈地街，街是重點，提高『地』字反而不美。
變音例子不少，如耳環、手環，環字就讀成『挽、玩』才順口，但如果碰上脷環、鼻環、臍環，你讀高反而覺得怪怪。(陶傑則一於全部讀高)
住的洋樓，樓會讀成『扭』，去買樓，o的樓好貴都讀成扭。
但若果黐住其他字，就會讀原音，如樓價、樓宇、樓房、樓花等。讀扭得唔得？李嘉誠訪問時就講『買扭花』，聽落覺得好怪，但又唔可以話佢錯o既。
但其實重有不少exceptions，舉例『行』字，指公司時讀成『行業』的杭，但大多會變成『慷』音，如金行、米行都讀慷，但銀行大多讀成『銀杭』，不變音，我有朋友讀成『銀慷』，初聽怪怪的，但其實基於同原理變音，但我就一定講『銀杭』不變音，冇得解。
總之大致原則係尾字太低會提高，如亞陳，會講成亞診，蛋牛治變成蛋嘔治，香腸(詳變搶)，士的讀『是』的，的士讀成『的屎』，但男仕、女仕一定不變。
另一個有趣的是，如疊字時，讀音高時會不變，低時會一個變，一個不變。
例如樂樂、恩恩、思思、安安，兩音相同，但如盈盈會講成『盈影』、誠誠變成『誠醒』、祥祥變成『祥搶』、玲玲變成『零擰』。
有趣廣東話，讀得正己難，講得地道更難。

因上一輩為了強調油麻地，跑馬地，新填地街，大笪地,這些的地方都是香港
獨特的地方名,所以一路都將地音讀高,後一輩都是跟前一輩薪火相傳,一直流傳
到現在都將地讀成高音。