鄰居不斷噪音滋擾，業主袖手旁觀，可以怎做？

我租了現時住的套房7個月，至今年8月才約滿。當時交了兩個月按金；合約訂明未租夠一年只退還一個月按金，而按金亦不可當作租金。
當我和丈夫搬入去幾個禮拜，就發覺隔離屋成日半夜三更飲醉酒之後就鬧交、講哂粗口、掟嘢，有時會動手，每次都嘈到我地冇覺好瞓。我地試過去拍門，想當面講下個問題，對方唔開門，但就隔住幅牆講哂粗口鬧我地拍佢門！我地同業主講，業主話對方嘅回覆係唔認為嘈到我地，仲話我地去拍門係我地騷擾佢！又唔認鬧過我地！之後業主話已於佢地單位裝咗隔音棉，我地以為已經解決到啦，點知又輪到玩嘭門！理應我地每間套房度門都有一定重量，普通關門係唔會做成咁大聲響，可以好肯定對方係刻意大力嘭門至會咁大聲！成日三更半夜或者清晨4、5點，飲大咗返屋企就嘭門，我地真係嚇到紮醒！吵架聲有隔音棉隔到，但嘭門聲、揼牆聲真係隔唔到，我地真係好嬲，一個星期起碼3次係咁！再同業主講啦，隔離屋竟然話自己冇返屋企！講到係我地無中生有咁！業主又不了了之！情況一路持續，我地同業主講咁樣好難住落去，咁當然我地希望可以攞返兩個月按金啦，但業主唔肯，話因為合約已寫明規矩。仲話自己做唔到D乜，話我地應該自己搵對方溝通而唔係搵佢！我話我地唔係冇試過，係對方唔肯溝通仲鬧返我地轉頭，跟住個業主只拋下一句「咁都冇辦法」！我真係覺得呢個業主好不負責任！最嬲係佢仲話之前兩任租客都冇反映過同其他鄰居有咩問題，言下之意即係話我地有問題！
我同丈夫都好想搬走，但又唔想益一個月按金俾個咁不負責任嘅業主！可以點做？有冇過來人或懂法律人士敎下我？十分感激！