我成日都會擔心好多野.....到依家仍然好困擾....

我有時得閒果陣會唔知點解無啦啦出現以下咁多既憂慮：

第一，我唔知點解會好擔心好多不幸既野可能會發生係我身上，例如會諗起電視劇ｄ情節可能會係現實度發生：就好似擔心家人有朝一日會借大耳窿搞到比人上門追數、行行下街比人打劫或者比人屈偷野、又擔心比人係背後扑頭或者比衰人拐走等等既難以預計既意外．．．

第二，我睇新聞果陣都不時會發生一ｄ罪案同意外，例如熱氣球事件、冷血兇殺案、痴線佬無啦啦斬人、升降機急墜、巴士司機因為揸揸下車突然間暈左搞到好多乘客造成死傷嚴重呢d等等咁恐怖既罪行同意外，因為呢ｄ野完全係意料之外，冇人預計得到，發生左亦都已經太遲，搞到我有時會好擔心自己可能下次都有機會成為受害者，愈諗真係愈覺得驚．．．雖然機會未必好大，但真係都覺得香港呢個地方都唔係想像咁安全．．．實在令人心寒。。。特別係因為近期新聞報導呢ｄ野先令我咁不安同擔憂。。。覺得自己平時熟悉既地方同事物都變到好陌生。。。。更加發覺香港人既危機意識根本不足。。。到發生意外之後都已經太遲。。。

第三，我有時都會諗好希望終有一次有機會可以去到外地旅行，但係又驚去到外地旅行果陣無啦啦會預到地震等等冇人預計到既天災，搞到我個心有時猶豫不決．．．．實在唔知打唔打消呢個念頭．．．亦係我困擾既問題之一．．．

第四，雖然我同家人關係唔多好，家人又唔理解我想法同埋成日係度煩住我，搞到我好反感，有時仲會想佢地係我眼前消失，但當我諗起如果終有一日如果家人死左得返我一個孤零零果陣會點算！？因為我完全唔識照顧自己，例如連煮飯同做家務呢ｄ野我都唔識，到時我可以點樣幫到自己亦係一個問題，好擔心有朝一日得返我一個果陣會變成點．．．可能我真係諗得太長遠，但係諗起都已經覺得好可怕．．．我平時都唔會點諗起，只係有時睇左某ｄ電視劇之後就會無啦啦諗返起．．．．好怕電視劇情節會延伸至現實．．．

第五，我擔心有朝一日可能會有癌症或者糖尿病，因為有癌症或者糖尿病好大機會會冇得醫最後搞到要死．．．好驚自己會不幸中招．．．愈諗都係愈覺得擔憂．．．．

第六，我又擔心自己老左之後唔知會變成點同埋諗起幾時會面對死亡或者果陣既場面真係都好可怕。。。真係好希望呢ｄ畫面唔會再係我面前出現。。。

第七，我有時仲會好驚係街或者搭巴士地鐵果陣無啦啦比人屈非禮，因為早前睇左篇有人屈非禮屈到人地要坐監。。。愈諗都真係幾令人不安。。。搞到咁提心吊膽都唔知算唔算無謂。。。

第八，我睇電視劇果ｄ精神病患者精神失常果陣就會好擔心自己會唔會好似佢地咁患有精神病。。。有時仲會懷疑其實自己係咪已經有精神病。。。而且家人都好似覺得我有精神病同自閉症。。。令我都開始懷疑自己到底係咪真係有病。。。因為小學至初中時期不停比人欺凌，完全係敢怒不敢言，果段時間算係我最黑暗既經歷。。。可以話搞到我精神失常同幾乎崩潰。。。幾乎日日過住以淚洗面既日子。。。完全可以話係嗌破喉嚨都冇人知冇人理。。。。更比家人覺得我係咪患有精神病或者自閉症。。。直至中二至中三之後情況算叫好ｄ。。。亦開始能夠慢慢暫時忘記呢段咁令人叫苦連天既過去。。。

第九，我又突然諗返梅艷芳去世既事件，因為佢明明唔算好大年紀居然咁快就受到病魔既折磨，最後仲搞到要離開呢個世上。。。真係令人覺得好意外同心寒。。。。好擔心自己可能都會好似佢咁。。。甚至擔心可能唔夠３０至４０歲就已經要死。。。。

第十，我又擔心自己呢一世打工點努力搵錢都買唔起自己心目既理想家居（私樓或村屋），不過又諗即使自己真係有經濟能力買到理想既家居，但又擔心會比人爆格（特別係村屋），同埋我又諗如果到時經濟負擔冇問題既話，好想請個工人幫手打理屋企，但係我又擔心工人手腳唔乾淨會偷野，覺得好唔安全同不知所措。。。

第十一，由於我過往慘痛既經歷，搞到我日後都唔係咁敢同其他人講咁多野，搞到個人好沈默，甚至比人覺得自己係傻仔兼自閉，又怕萬一同人熟左之後可能會出現反面或者比人出賣既情況，不過自從係中二至中三果陣識到幾個難得既好朋友之後情況先開始有少少改善。。。雖然唔算好明顯。。。但係的確算係比起以前開心左少少。。。但當諗起萬一好朋友要離我而去果陣既場面唔知點解又會好恐懼。。。。好唔想呢種情況會發生。。。

我屋企人同信得過既人都話我諗得太多，到底我係咪真係太杞人憂天或者真係去到有病既地步？愈諗就真係愈困擾．．．

雖然我平時冇乜點刻意去諗，亦都唔會諗得咁長遠，只係當好靜或者一個人果陣就有時會唔知點解會諗呢ｄ咁既野．．．． 因為呢ｄ野冇得防範同避免先搞到個心有ｄ驚。。。呢ｄ擔心雖然未至於影響到日常生活。。。但只要一諗到有機會發生呢ｄ意外果陣就會覺得好不安同心寒。。。好唔想見到咁可怕既場面。。。覺得好危機四伏。。。 因為近期新聞接二連三咁報導種種罪案同意外實在叫人深刻同可怕，加上近期播既電視劇某ｄ情節又搞到我不安既情緒無啦啦再次湧現。。。。