我得閒果陣唔知點解會出現好多憂慮....真係好大困擾....

我有時得閒果陣會唔知點解無啦啦出現以下咁多既憂慮：


我唔知點解會好擔心好多不幸既野可能會發生係我身上，例如會諗起電視劇ｄ情節可能會係現實度發生：就好似擔心家人有朝一日會借大耳窿搞到比人上門追數、行行下街無啦啦比人打劫或者比人屈偷野、又擔心比人係背後扑頭或者比衰人拐走等等既難以預計既意外．．．

我睇新聞果陣都不時會發生一ｄ罪案同意外，例如冷血兇殺案、升降機急墜、巴士司機因為揸揸下車突然間暈左搞到好多乘客造成死傷嚴重呢d等等咁恐怖既意外，因為呢ｄ野完全係意料之外，冇人預計得到，發生左亦都已經太遲，搞到我有時會好擔心自己可能下次都有機會成為受害者，愈諗真係愈覺得驚．．．雖然機會未必好大，但真係都覺得香港呢個地方都唔係想像咁安全．．．

另外，我有時都會諗好希望終有一次有機會可以去到外地旅行，但係又驚去到外地旅行果陣無啦啦會預到地震等等冇人預計到既天災，搞到我個心有時猶豫不決．．．．實在唔知打唔打消呢個念頭．．．．亦係我困擾既問題之一．．．．

仲有，雖然我同家人關係唔多好，家人又唔理解我想法同埋成日係度煩住我，搞到我好反感，有時仲會想佢地係我眼前消失，但當我諗起如果終有一日如果家人死左得返我一個孤零零果陣會點算！？因為我完全唔識照顧自己，例如連煮飯同做家務呢ｄ野我都唔識，到時我可以點樣幫到自己亦係一個問題，好擔心有朝一日得返我一個果陣會變成點．．．可能我真係諗得太長遠，但係諗起都已經覺得好可怕．．．我平時都唔會點諗起，只係有時睇左某ｄ電視劇之後就會無啦啦諗返起．．．．好怕電視劇情節會延伸至現實．．．

同埋我又擔心有朝一日可能會有癌症，因為有癌症好大機會會冇得醫最後搞到要死．．．好驚自己會不幸中招．．．愈諗都係愈覺得擔憂．．．．

我屋企人同信得過既人都話我諗得太多，到底我係咪真係太杞人憂天或者真係去到有病既地步？愈諗就真係愈困擾．．．