✔ 最佳答案
關於平可夫，小弟對佢真係幾失望。佢經常空口講白話，成日攞自己既名譽開玩笑，遼寧艦明明成隻船行得，竟然夠膽話大陸無攔阻索技術，甚至話佢估唔中執左漢和！雖然漢和仍然係高質素軍事雜誌，記者採訪認真，文章有深度，但平可夫本人既言論過份偏頗，永遠唔公正咁踩大陸。佢為左証明自己正確，甚至不惜大肆吹捧馬來西亞、越南及菲律賓等小國，連解放軍高層既英文水平都成為被批評既對象。真係好想問佢，彭德懷元帥英文水平如何﹖同佢將幾十萬聯軍趕過三八線既赫赫戰功有乜關係﹖
老實講，殲20明顯不及F-22，剩係殲20引擎既巨大噴嘴已經完全無得同F-22仔細設計，大力減低紅外特徵既噴嘴設計比較。而且殲20既外形較為臃腫，線條較粗糙，再加上較大既機體及鴨翼佈局，殲20隱身能力必定比F-22差。
不過，T-50比殲20更差。如之前所講，T-50個座艙設計及非常粗糙既表面處理工藝，差過殲20一皮唔只，T-50既雷達反射率必定高過殲20一個數量級。另外，殲20既蒙皮處理非常優秀，係佢隱身能力既重要來源，T-50唯一有優勢既只有俄國長期佔優既IRST系統，不過呢樣野殲20都應該有，未必差過俄國戰機。
大陸糞青既垃圾言論從來唔需要理，佢地中晒毒，凡事以反美為先，言論徹底情緒化，完全唔客觀分析。F-22 2005年就服役，機動力強，隱身能力強，機體每一處都經過精心設計，用最大努力平衡隱身能力及機動性，即使佢既戰力未必如想像中咁強，但單睇外表就會發現F-22係美國工業設計既顛峰之作。殲20係呢方面明顯有不足，雖然任何中國人都想國家進步，但要進步必先承認與各路先進之間既差距。
雖然殲20係科技上不敵F-22，但小弟認為殲20反而係實戰中有一啲寶貴既優勢。經常有人話殲20既機體太長，不過我從來唔明機體大啲長啲有乜問題。飛機內部空間係寸寸金，多少少位就可以裝更多設備及燃料。網上普遍認為殲20有好大既儲油空間，所以作戰半徑長，應該長過2000公里，如果係事實就非常重要。因為殲20作為世界頂尖既隱形戰機，如果可以長途奔襲遠方敵人，一定可以係絕地對敵人構成極大優勢，因為殲20既滯空時間會更長。F-22與之對戰，除非一劍封喉，否則F-22未必夠燃料同殲20纏鬥落去。如果連F-22都唔可以同殲20纏鬥，只有單引擎既F-35就更加唔。若殲20如傳聞一樣可以用1.82馬赫超音速巡航，咁就更加不得了，到時殲20係外型設計上既不足之處就未必咁重要。
另外，雖然殲20無F-22設計得咁精細，但咁樣可能更切合戰場既惡劣環境。有不少言論認為F-22雖然高科技得令人嘆為觀止，但過份重視隱身性能，導致其他性能未必及得上敵機，即係話若F-22隱身能力一被破功，就好有可能要挨打，F-22既優勢變成完全依賴是否可以完全先敵開火及完全係視距外攻擊。如果美軍掌握絕對制空權、制電磁權及制訊息權，F-22做到上述兩點應該無問題。但中國並非三流小國，F-22要係絕對安全既環境攻擊殲20實在令人難以致信。
小弟認為，殲20絕對唔需要同T-50比，後者連科技落後既印度都可以參加研製，就知道好打有限。殲20既競爭對手應該係F-22，未來亦必須瞄準美國既發展來改進中國既戰鬥機科技。
2013-02-24 12:02:57 補充：
網上有人話平可夫其實係中國人，姓張，未搞漢和之前係貴州一名中學教師，後來唔知點解去左加拿大同搞雜誌。據佢自己講，佢係日本及加拿大打滾過一段時間，主要做翻譯及記者，佢亦宣稱自己跑軍事新聞超過廿年。
2013-02-24 12:25:47 補充：
平可夫的確係一個非常好既軍事記者，佢唔單止去好多華人好少去既地方採訪，而且同好多國家既軍隊高層有良好關係，剩係聽呢班大佬講野已經值得睇漢和。只係我想平可夫珍惜佢自己及漢和得來不已既名譽及地位，唔好再亂嗡野。有不少人將漢和當作其中一個權威消息來源，就係因為平可夫多年來可以做到認真採訪，有堅料比廣大軍迷參考。但近年平可夫實在吹水吹得太大，好難再將佢既言論當作高可信性既權威分析，咁樣只會令漢和既價值大幅降低。
2013-02-24 18:07:13 補充：
回隔離版志雲兄既意見。小弟一向覺得印度係一個軍事力量、經濟及科技水平與其野心唔相襯既國家。成日都有人話佢科技強，甚至話佢既IT科技一流，但我始終一啲都唔覺。如果印度IT真係咁勁，以今日智能手機之普及，起碼會有一、兩個印度手機品版掛﹖但過去廿年，唔好話手機，印度連低端PC或手提電腦都無打入過國際市場，話佢IT勁，實在好難令小弟信服。
2013-02-24 18:18:35 補充：
如果印度連最耍家既IT唔係如想像中咁勁，其他科技就更不堪一提。關於印度武器人機介面情況，最好就係睇印度現役武器既介面科技如何。印度國產阿瓊坦克用既裝備一樣係萬國牌，而佢既操控介面及火控系統唔係完全國產，係同以色列合作，如果連重點國產坦克既介面都無法獨立生產，好難想像係最尖端俄印合作戰機開發中，印度會有超越俄羅斯既表現。
