第五代戰機T-50 VS F-22

✔ 最佳答案

風兄呢個問題非常有趣。如果係一、兩年前，我會毫不猶豫認T-50追九條街都比唔上F-22，但自從見到連變形金剛級數既F-22竟然會因為哮喘病而停飛，飛過國際換日線又搞到神經錯亂，再加上美軍連價值連城既B-2亦派去出戰，但身為未來中流砥柱既超級空優戰機就連利比亞空軍都唔敢打，睇來F-22既問題比想像中嚴重得多。值得注意既係，反而之前比人鬧到喊既F-35愈來愈進步，開似有D訂單，佢既將來未必好似之前睇得咁淡。

話雖如此，但小弟仍然認為T-50比唔上F-22，因為兩者差距比較明顯，起碼一睇座艙蓋就知。F-22繼承F-16既優良傳統，座艙蓋係一體成型，前後視野優良，而且內層鍍金減低艙內電磁輻射外洩，而T-50既座艙蓋繼續係裂成幾塊。座艙框係強烈既雷達波反射源，而座艙框太多亦嚴重影響飛行員視野，對重近戰既俄系戰機來講絕對係弱點。

另外，T-50氣動外形較差，設計雖然明顯參考F-22，但線條粗獷，唔夠緊緻。近睇T-50更加嚇死，表面工藝非常粗糙，鉚釘非常生硬釘住蒙皮，擺明係放棄呢方面既隱身努力。T-50無S進氣道，噴嘴無做減紅外線處理，紅外特徵比定高過F-22好多。雖然我唔認為T-50粗製濫造，但無論設計及手工同F-22無得比，連J-20都明顯比佢好。俄國一向以研究等離子體隱身為主，飛機外型隱身絕對唔拿手，我估呢架機係俄國迫於F-22出現既壓力，俄國將所有希望擺晒係蘇凱公司身上，而蘇凱勉為其難既成果。情況有啲似T-90，因為T-80唔多店，所以改用T-90作為坦克主力。

不過，江湖傳聞俄軍雷達非常厲害，Su-30MKI 多次係紅旗演習擊落F-15係因為印軍戰機雷達可以好早發現F-15。另外，據聞俄軍IRST系統非常邪門，配合頭盔瞄準具及高機動性格鬥彈戰力非常強，波蘭空軍內部演習較舊式既Mig-29 經常以此擊敗較新式既 F-16。而且，根據蘭德公司2008年嗰份著名報告，超視距空戰既成功率無想像中咁高，未來F-22有頗大機會需要同最先進既敵機近戰，雖然F-22有好強既機動能力，但偏偏缺乏俄機最強既近戰系統，到時輸既機會幾高。

總體來講F-22科技比T-50高半代左右，工藝及設計亦好得多，但高科技變形金剛雖然極之有型，但F-22既實戰能力令人非常懷疑，主要係遠距離空戰時未必有如美國宣傳既誇張得勝率，如果F-22需要經常參與近戰，佢相比起俄機應該唔會佔太多便宜。除非F-22係美國掌握絕對制空權下與T-50對戰，否則好難大獲全勝。

2013-02-19 22:25:57 補充：
回風兄既問題。隱身科技有兩大流派，以美國為首既係外形隱身，即係透過經特殊設計既機體外形，將雷達波反射到對方雷達收唔到既方向。一般外形隱身會有吸收雷達波材料作為輔助，F-117、B-2及F-22係呢方面既表表者，而呢三款軍機亦代表美國隱身科技既三個世代。F-117作為第一代隱身戰機只有充滿稜角線既雷達反射面，呢個設計係受限於設計當時既電腦科技無依家咁先進，到B-2時已有大改進，F-22更係登峰造極之作。

2013-02-19 22:31:20 補充：
另一流派係以俄國為代表既等離子體隱身，呢款科技無論個名同原理都極之有型，而且科幻過科幻小說。佢既原理係於戰機上下裝設一條放高壓電既天線，放出來既電壓高到可以即時電離包圍戰機附近既空氣，令戰機被包圍係一個由等離子體構成既雲入面，戰機就係靠呢個等離子體吸收或反射所有雷達波。

2013-02-19 22:34:36 補充：
呢個概念雖然真係極端有型，但一聽就知有問題。即使戰機雄偉巨大到好似Su-27，但戰鬥機要應付激烈空戰，外型必須精幹洗鍊，佢邊有咁多空間放一個肯定體積極大，又可以放出非常高壓電既裝置﹖架機又點樣提供生產高壓電既巨大能量﹖

2013-02-19 23:19:10 補充：
另一個問題係即使有足夠能量生產等離子體，但要係不停係機體表極高速流動既空氣中保持等離子體既濃度亦非常困難，再加上戰機經常要做激烈運動，要保持有效既保護層可以話係無可能。俄國隱身走上呢條路明顯係因為當年蘇聯電腦機體設計科技大幅落後於美國，唯有另走偏鋒。可惜呢個科技真係太過科幻，俄國根本無法做到。小弟係1990年代仲聽過下呢種科技既有關消息，但近年已經銷聲匿跡。

回答 (4)