到底中學時期既仇恨有冇可能直到永遠?實在好憂慮

我已經中學畢左業接近1年,記得當年係中1至中3時期,我自問自己從來都冇乜點得罪D衰人,但D人不停係咁恰我,恰到我敢怒不敢言,其中有個帶頭恰我既仲係小學時期已經恰緊我,仲不停係其他同學面前將我標籤化,仲一齊排擠我,當正我係異己,仲成日係咁講粗口串我,搞到放假出街果陣都要提心吊膽,好擔心會見到佢地,真係搞到分分鐘都精神失常(但好彩未去到想自殺既地步,換著係第2個可能已經頂唔順自殺左).....仲好多次搞到返屋企果陣偷哭,而果D衰人不但冇停手,仲愈黎愈過份,搞到我日日返學都提心吊膽,成隻過街老鼠咁,跟住之後我因實在忍無可忍,為左報復佢地而做左一D好過份既野,直頭可以話係令人髮指到唔敢相信,只差在犯法同唔犯法既分別,不過我唔方便講咩事,怕惹禍上身同被人起底),總之就係對佢地傷害好大....更加因為咁激怒左佢地,比佢地反返我轉頭,搞到大家之間既仇恨愈黎愈深,可以話係一發不可收恰....直頭係去到要互相廝殺既地步....

之後亦都搞到我開始愈黎愈怕同其他人接觸,變到好少主動同人講野,搞到成個傻仔+自閉咁....好怕自己再一次受到傷害....又怕即使識到新FD都唔會做得長,隨時會有反目成仇既可能,又擔心自己會被出賣....搞到好大困擾....分分鐘有抑鬱同比人懷疑精神失常.....去到中2-中3之後,班人相繼唔同班之後,情況都開始有D好轉,亦係度識到幾個難得既好朋友....情況都可以叫有少少改善....雖然多數都貌似仍比人覺得傻仔+自閉,但公然既針對性攻擊既欺凌都開始冇乜再發生....但因為咁相對變得存在感薄弱,之後情況並維持到畢業.....

我記得當年係初中時期可以話比佢地搞到我臭名遠播同永不翻身既地步,實在好驚佢地會記仇記到依家,好怕D人會係其他地方做D敗壞我名聲/人格既行為,令我陷入萬劫不復之中.....又擔心我同佢地會唔會有機會重遇做埋同事,如果真係發生左就真係弊,實在好怕佢地會舊事重提同再次咁不停針對同攻擊我同周圍係其他同事面前作出敗壞我名聲/人格既行為,企圖將我魔鬼化,搞到我變得孤立無援,令所有同事當正我係敵人,真係好擔心因為咁搞到我前途盡毀.....即使自己真係過得到自己,但D人始終都係覺得「律己以寬,待人以嚴」......所以我擔心佢地未必會咁易放過我,真係好擔心萬一咁不幸重遇做同事既話點算?我又應該點樣對應?

我依家諗返,亦都好後悔點解當年咁唔成熟同衝動,一時之氣做左一D無法挽回既事,呢段往事可以話係不堪回首,只能夠安慰自己靠時間沖淡一切.....事情雖然已經隔左接近5-6年,平時都唔會點擺係心上,但有時訓果陣又唔知點解會胡思亂想,諗返呢D咁黑暗既過去.....我真係覺得好困擾同無助,完全唔知點算好....

到底中學時期既仇恨有冇可能直到永遠架?我仲因為咁搞到係FB要BLOCK左唔少人,因為實在好驚佢地會做一D對我不利既行為,搞到我前途就咁斷送....我有時仲懷疑自己有焦慮/被逼害妄想症....希望好心人睇到我寫既文章比下意見....THANKS