手術痳醉感覺

和你分享吓經驗. 你知多咗就唔會咁驚架啦.

先答你問題:
- 麻醉時完全失去知覺. 處於昏迷狀態.
- 麻醉後多數會痛, 視乎位置, 甚少大痛.
- 麻醉狀態, 感受和睡眠完全一樣.
- 手術時, 你唔會知佢哋做任何嘢, 會插喉及有呼吸機幫你呼吸, 麻醉師會全程睇實生理數據, 可放心.
- 會有條尿喉插入小便位, 小便唔落尿袋, 大便方面, 如果擔心影響手術, 之前會要你飲瀉藥清腸, 加埋禁食. 十幾年來確實未聽過有這情況.
- 局部麻醉你會仲驚, 因實時見著醫護人員工作, 無痛感但足夠恐懼感; 想反全身麻醉只係瞓一覺, 醒返已做完.


附加資料: (下文很長, 嫌我長氣請省略, 勿浪費時間)
一般公立醫院收人程序: 應個別情況不同, 以下只是一般程序, 僅作參考.

1. 做手術之前帶齊醫生轉介信, 入院通知書等依時入院, 到病房報到, 分配床位, 換衫, 抽血 (check 適合做手術否, 及配血等其他事前工作), 手術前會同你種豆 (一個供輸液 / 輸血, 皮膚上裝置, 通常在手背), 同時院方會同你做埋一大推手續. 得閒就 check 埋探病時間, 等親友知幾時探你, 通常要留一個外面親友電話, 有事醫方會通知佢, 例如出院.

2. 等見醫生, 佢會交代手術前中後一切你要知嘅事宜, 例如做甚麼手術, 邊個同你做, 做幾耐...等. 有問題當面問佢, 之後問護士都OK, 但最好一次過問哂.

3. 禁飲食, 一般手術前 8 至 12 個鐘禁飲食. 視情況你可能入院前已禁, 跟醫護人員指示就OK.

4. 期間有人會好幾次問你問題, 通常係你知唔知入院做咩, 有無高血壓 / 糖尿病, 有無敏感.......等等. 在你角度可能有啲癈, 但對佢哋嚟講, 呢個係指定必需程序. 可避免出錯.

5. 入到手術室, 入面會有主刀醫生, 麻醉師, 手術室護士, 或其他人. 問完你問題, 喺你個種豆位入一啲藥, 會感到有嘢入但無痛感. 之後會比個口罩你吸 (罩下連住條粗管, 嗰啲係麻醉氣體), 吸咗之後幾秒左右你就會完全無知覺. 你昏迷之後, 會 check 你一大推嘢數據, 肯定安全就開始手術. 醒返已經做完, 對你嚟講只係瞓咗一覺, 確實無分別.

6. 做完之後, 會安置你响一邊等你醒, (呢度醒嘅係醫學上, 未必等如你完全清醒, 好多人呢段會斷片) 之後送你返病房. 成個手術已做完. 感覺上你會超攰.

7. 手術後, 可能你身上會多咗幾粒種豆, 或有嘢夾手指(狀似鬆衫夾), 或有條帶包住手臂(似量血壓嗰啲) 駁住部機, 多咗條尿喉, 床邊勾住個尿袋, (小便要喺床上面搞掂. 唔痛但感覺怪怪, 開始時好多人會痾唔出, 慢慢會慣. 隨後一兩日會有大量痰, 隨住傷口慢慢「埋口」 會好痕, 盡量忍住. 要記底飲水量, 或會定期抽血. 之後就係等醫生巡房, 會同你交待返手術嘅嘢同 check 傷口及情況等, 見痛問護士比止痛藥, 見凍攞外套. 有需要就「禁」鐘仔.

入院至出院會痛嘅地方
- 抽血 ~ 小痛, 種豆 ~約比抽血強一兩倍, 視落針者手勢. 完全唔痛都得.
- 手術後: 傷口疼痛, 由麻痺到中痛都有, 視情況, 手術後咳, 經驗上真係要咳時, 盡量按實傷口邊緣但唔按正上面, 可稍減痛感.

入院前準備 / 禁忌:
- 入院前約 48 小時忌酒忌藥, 飲食過就每次都要記底時間份量, 入院時同抽血醫生講聲.
- 隨身行裝越簡單越好, 搵個信得過嘅人陪你入院, 貴重嘢交比佢KEEP 或帶走. 唔比都得, 自行評估風險 (醫院內記得關手機, 比人知插硬), 會有櫃桶比你暫存隨身嘢.
- 起居用品: 厠紙(卷), 拖鞋, 牙膏牙刷, 水杯, 要沫身就帶埋膠盤毛巾清潔液. (攞住個盤係咪有啲入冊feel?? 夜晚派餐有埋個橙嗰陣仲似 (說笑) )
- 唔好買定止痛藥諗住手術後食, 唔係出事嗰陣, 人哋就無咗份工, 你就無咗健康甚至條命. 比個例子你, 阿士匹靈用嚟止痛聽過啦, 呢隻藥同時係心臟科用嚟簿血嘅 (使血液凝固即止血能力降低), 你做完手術等埋口, 食啲薄血類藥 (尤其係皮內傷口), 當出血時你自已諗諗後果係點.

希望資料能減輕你壓力, 第一次手術我都好驚, 但實在告訴你, 經歷過後你真的會覺得沒甚麼大了. (雖然我知呢句現時無用). 就好似第一次考公開試咁. 有嘢想問直接寄信比我啦, 喺度加補充唔會有人通知我, 我唔會知架.

預祝你手術順利, 早日康復

我做過一次手術要全身麻醉,我果時都好好奇麻醉左會點XD
我唔知你將會做邊種手術,但係一般黎講,麻醉係用打針方式,或者吸入麻醉氣體
我之前係打針,可能係因為係我背脊要做手術啦~
果時我一打針,正好奇之後會點呢?既時候,係果一瞬間閒到D好怪既味- -我想鄒眉頭果時就訓著左啦~之後就乜都唔知,然後有個姑娘無啦啦講左句,"做完手術啦~"我就醒左,比姑娘推緊出去~其實一D都唔洗驚啦,我做手術果時得果都係16,7歲~心情係只有好奇@.@
加油!手術冇問題架!
祝你快D好番!

做手術前會見麻醉科醫生先,看要下的麻醉藥份量,有半身麻醉/局部麻醉/全身麻醉的.牙科多用局部.醫院做的多是半身或全身麻醉,骨科多全身麻醉.麻醉了做手術受傷或做手術部位會短暫失去知覺,當手術完,麻醉藥散後,做手術部位傷口會開始腫痛的.要過幾天消腫才唔痛,要視孚做什麼手術.