想擺脫童年陰影和自卑

我細個既時候因為屋企係單親家庭，細個果時
我應該仲係手抱bb，我有個畫面係親眼見到我媽咪走
我一直都分唔清真定假，後來確實左係真既，
後來我家姐都話，我果時禁細個竟然都記得，我同家姐兩個人
我就跟親戚住，佢就跟阿爸，細個果時我係親戚屋企
表姐成日唔鐘意我，表弟就同我好Ｄ，但因為我姑姐好錫我表弟
所以有時我表弟蝦完我，佢喊我姑姐就會鬧我
細個果時係我親戚屋企每時每刻都係戰戰兢兢..
有時怕比人鬧有時食飯果時佢地會熄電視，就話食得最快可以選擇睇唔睇
我細個好蠢，見到飯又唔敢出聲淨係一味係度食，
點知又食得好快，我姑姐緊係唔想比人開啦，
我表弟表姐又好想開，但我好驚所以只好話食多碗，
成日食到半夜三更起身嘔返出黎，因為太驚佢地會同鬧
佢地會要我跪係度背乘數表，會要我洗碗，
每次食飯一定要食得好乾淨，依家大個我經常食飯都會留低一舊
唔知點解，我有諗過關唔關事，我就算成個飯盒食哂只淨一啖我就唔食
我成日都覺得食完會好飽所以點都唔會死，但其實都係得一啖，
我都係大個人地同我講我先發現到，而且佢地仲會叫我做狗
有次聽到有Ｄ人話叫佢唔好禁叫，但佢就話佢無所謂架不嬲都係禁叫
之後仲特登叫我，我都應左
大個小小終於返屋企住，但因為單親家庭，收入又唔穩定，
有時屋企會無電無水，阿爸好多時好夜返，得返我同我家姐
到依家大個，我都好怕黑，訓教一定要有燈先訓得著，
有時細燈壞左我就開廳既燈，要有光先訓到，
細個果時阿爸比定呢個星期食飯既錢我家姐
有時用得好快，就會一兩日無飯食，無電就要開門做功課
阿爸好錫我家姐，後期我家姐大個左離家出走，
間屋得返我同我阿爸，我同佢無咩溝通，因為佢都會鬧我
返到屋企都係戰戰兢兢禁一直生活落去，到我中一果年識左好多朋友
我開始學壞左，食煙吸毒，偷阿爸錢，然後經常唔返屋企
後尾我家姐返左黎，佢知我好多事，好記得有一次佢打左我一巴，
因為我講粗口同吐口水，呢件事係我心入面好耐，其實我同我家姐關係唔差，
中一後我成日覺得自己讀唔到書就唔讀，結果依家學歷得中一
亦都因為由果年開始我成日出去玩，發左好多事，每一次都令我覺得好恐怖既經歷
到差唔多１７－１８歲開始大個，個人識諗左，無再去吸毒，無再出去玩，
但就變左自閉，仲好自卑唔敢出街見人，個人無哂自信心，
我覺得自己好似廢人，學歷低，仲要個身好多紋身..
好多人見到紋身都覺得係壞人，令我要連夏天都要著外套唔敢比人睇到。
我係４年前零８年既時候知道左自己媽咪死左，唔知點解，
明明１０幾年無見過，但都心痛都哩埋係房喊左好耐，
加上呢一年無自信，又自卑，真係差小小就去左自殺。。
留下既原因係因為我阿爸，心諗住知道佢好辛苦養大我地，
到依家我都仲係好自卑。。知道我有紋身既公司。。我就唔想係果度返。
我唔敢話比人知自己得中一，因為好自卑，所以我成日講大話
講到自己點樣點樣，同埋我拍拖無辨法對一個人好認真，
又或者真係好鐘意我都唔會認，情願分手都唔認，
我成日諗返細個既事都會好難過，其實到依家同屋企關係幾好
日日都有講有笑，見返我ｄ親戚我都係會唔出聲，
我亦都知佢地其實大個見到我，見到人都唔敢出聲佢地都好內疚
有時想同我傾計，但其實我真係唔知同佢地講咩好，
我依家已經過返正常生活。。但因為紋身亦令我好自卑，
我既朋友話紋身唔代表係壞人，的確係，但其實有紋身好多人都覺得唔係好人
我真係好自卑，童年陰影都令我成日講大話，
我唔想再講大話，但唔識點面對自己，好多事我唔敢同我身邊既朋友講，
唔知各位幫唔幫到我