想改變內向、不善交際既性格

我係20歲男仔,摩羯座性格,個性內向沉靜
家中排行最細, 有兩個家姐和一個阿哥,都大我7年或以上
仲有,我係同性戀者,我係

---以下係我既成長經歷---

學校方面,小學時我好傑出,年年考第一,做班長做圖書館管理員做風紀隊長參加比賽做模範生。去到三年班都同d同學關係良好,因為我比較傑出,佢地都尊重我。去到四年班開始比成班同學杯葛,比人蝦,係老師面前講我壞話,因為佢地覺得我扮乖,平時我開始同佢地開玩笑,比佢地「好拽」既感覺。去到小六時,情況更加壞,基本上冇同學鐘意我。令到我而家都覺得自己唔得人喜歡。
由中學開始我性格開始變得內向,極沉迷打機,係極沉迷打機
係學校又唔凸出,同d同學關係一般般咁唔太熟唔太生,比較易比人蝦,例如會玩下我
係群體中通常冇人理我,好似隱形咁,朋友唔多,好少人搵我玩
同埋,我比人話我「乸型」,全部都係男仔,搞到我好冇自信,同埋自己一直、一直都好介懷

家人方面,小學時對住家人比較開朗,有d咩心事都會講,但學校唔開心就唔會講,例如比同學蝦
上到中學開始變得自閉,有咩心事都唔會同屋企人講,例如學校生活唔開心,同埋我同性戀既性取向,一直壓抑、壓抑、壓抑,覺得講心事就唔似男仔


---以上係大約在學校生活既寫照,以下係我對自己既生活察覺---

琴日同家人去了親戚婚禮,見左好多十幾年冇見既親戚,同佢地圍桌吃飯,當中冇咩人理我,可能同我唔太熟,同埋可能我係家族中係最細,都係問下我係邊個等。
但係自己就諗左好多問題,覺得自己性格好內向,唔討好,好想改...
發覺原來自己一直以來好多野都收收埋埋唔同人講,同屋企人又唔會太親密,例如講心事
同同學都唔會太親密,例如身邊總係缺乏好朋友相伴
就算係online game世界中,當同人地一齊玩個陣,都比較容易比人忽略,例如佢地有佢地講,我有我玩,好似唔入群咁
仲有,自己唔鐘意同人地咁親密,因為驚人地會傷害我,例如傾傾下計就會搵我來玩,或者又話我「乸型」;同埋,自己都驚同人地親密,因為我根本係同性戀者,我唔想比人知我呢個秘密,我唔想比佢地知我係同性戀者,所以根本同人地親密唔到...一做左fd,到你廿幾歲結婚既年齡,到時我都唔知點算
我一直同人地keep distance...我唔知就算自己「唔係同性戀者」,都唔知係咪根本唔鐘意同人地親密
就算我有個同性戀既朋友,日日傾電話傾心事,都覺得自己內心好孤獨,唔知點解會咁



我都唔知點解自己會係咁既性格
個人比較壓抑、忍讓、被動
想係呢到聽取下意見