中日海空戰...

✔ 最佳答案

回henry兄，中日兩國都係東亞巨強，兩國都係世界前列既軍事強國。雖然如此，但事實上中日兩國既軍事實力已經愈拉愈遠，如果日本係都要單獨同中國開戰，輸係必然既事。

好多人對中國海空軍有好落後於現實既印象。中國空軍現代化三代機數量，包括殲11、殲11B、殲10、Su-30MKK、殲轟七既數量已經超過日本。雖然唔會所有中國先進戰機都會參與對日作戰，但日本空軍與中國空軍最大既差距係F-15J數量不足，只有200架左右，而且最致命既係大部份F-15J都無法發射超視距空戰必須既中距彈AIM-120，相反中國大部份戰機都可以發射同類導彈霹靂-12。即係話只要中國空軍戰鬥機飛行員唔係低能兒，中國空軍就可以係遠得多既距離先向日本頂尖主力戰機開火，日本空軍係第一波交戰中損失肯定嚴重，之後第二波既纏鬥雙方戰機機動力不相伯仲，鹿死誰手都未可知。但幾乎肯定日本空軍戰機能參與纏鬥既戰機數量較少，因為係之前既第一波攻擊中已承受非常大既損失。

最好笑係有傻仔成日話日本空軍先進，連F-4都以為係先進戰機！有識之士都知道F-4係老過你阿爺既戰機，四十幾年前的確幾先進，依家實在係力不從心。F-2只係F-16極端昂貴既複製品，雖然F-2係機載相控陣雷達既始祖，但係人都知F-2既雷達極易甩目標，實力能力非常令人懷疑。

中國飛行員既質素係經常被人垢病或猜測既話題。講起日本空軍飛行員，通常都話佢地訓練時數較多，但中國飛行員近年既訓練時數已大幅提高，另外日本空軍飛行員訓練時數較多是否等如戰鬥力較高卻係未知數。小弟曾睇過一篇記載，話日本頂尖戰機F-15J係一次演習中，長機竟然錯手用實彈鎖定僚機，並將之擊落。呢單野簡直係聳人聽聞，首先點解經驗較多既長機竟然唔發覺僚機已被鎖定已經非常驚奇，長機飛行員又竟然可以安心發射飛彈呢下先至最解釋唔到。呢支空軍係唔係如預期中有咁強既戰鬥力實在係難講。

潛艇係日本完全無得鬥既一個範疇。日本對自己既潛艇部隊及反潛能力有一種好奇怪既樂觀情緒，無錯佢既反潛能力係幾強，但反潛機隊無論幾強都好，空軍爭取唔到制空權完全無用。日本潛艇少，技術並非最頂尖，至少以柴電潛艇來講無論數量及技術對中國完全無優勢。日本海軍最大鑊既係無核潛，核潛因為航程遠，潛深大，令中國海軍可以係公海控制龐大水域，好似福克蘭戰爭期間英國海軍對阿根廷一樣，日本潛艇因為只係柴電或最多只係絕氣潛艇，續航力不足，只可以係母港較近水域作戰。除非中國核潛係非常靠近日本既水域活動，否則日本海軍好難擊沉中國核潛。另外，中國較先進既柴電潛艇至少同日本所有最先進潛艇同級，數量亦唔少，對日本來講非常難搞。

好多人鐘意執日本仔口水尾，話中國海軍水面艦艇落後好多，但你叫佢地講究竟落後係邊度或落後幾多佢地立刻收聲，因為根本講唔到。老實講，如果十年前，話中國戰艦比日本戰艦落後絕對正確，但依家仲講就好難有說服力。首先落後係邊度﹖日本最先進戰艦有較多既垂直發射單元，反導彈飽和攻擊明顯比中國海軍強，日本戰艦反潛能力亦應該較強，但日本艦隊反艦能力非常弱，三十年來都只係用無乜改良既魚叉飛彈，相比起反艦能力非常多元化既中國海軍，呢樣野極端致命，之前對中國既優勢幾乎無意義。隨著東風21C及不久將來反艦巡航導彈既服役，天秤更繼續向中國一邊傾斜，日本連本來較強既反導能力都未必招架得住，事實上日本水面艦隊面對中國艦隊，打擊手段唔多，而且效能非常令人懷疑。好多人話中國多年未打過仗，但講呢啲野既人明顯批判思考能力非常差，中國六十幾年國祚起碼有1988年既西沙海戰作參考，雖然只係小衝突，但日本海軍真正係六十幾年來完全未打過仗，連小衝突都未試過！點解有人會對一支三份二個世紀都未開過一炮既海軍咁有信心﹖

中日戰爭，日本唯一可恃既只有美國係後面撐腰，面對超強美國，加上日本聯手，中國的確唔係對手。不過咁樣即証明日本獨自面對中國根本無有效政治手段可選擇，即使聯合美國，日本仲要小心中國會用戰爭以外既其他手段抗衡，呢啲更加係無法估計同難以招架既變化，尤其日本經濟唔好，外交地位差，近來一次過得罪晒中、台、韓三地，連美國都唔敢公開支持，可見係軍事外既其他方面，日本既承受力係非常脆弱。

2012-10-04 00:49:39 補充：
關於F-15J及日向級，小弟有幾句想回應。F-15J係空優戰鬥機，F-15K及SG係設定上係戰鬥轟炸機，兩款戰轟機後面有一個武器官係正常配置，相反F-15J作為純戰鬥機，實在應該只有一名飛行員。F-14有兩個人係因為AWG-9非常複雜，所以侷住要坐多一個人。F-15J最大既問題係大部份無超視距空戰能力及機體壽命太長，是否可以承受高強度作戰係未知數。

2012-10-04 01:17:52 補充：
日向號既用途要睇佢既任務如何。其實如果日本無F-35，隻艦只能做反潛母艦，當然呢個角色對中國海軍來講威脅都幾大。不過由於日向號基本上係一隻航艦，防空能力薄弱，連防空主角金剛級都好有可能自身難保，如果日本神盾真係破功，咁日向號只會係一個活靶。

回答 (2)