✔ 最佳答案
要答岩幾多題可入會,相信只有 Mensa 裡面出卷同管理試卷嘅人先知。況且你知道答對幾題可入會都作用不大,最多可以試後心中有個數,知道成功率幾高,但你都無法完全肯定到自己岩幾多題啦。
題目方面,如果我無記錯,係二十分鐘、四十五題。頭二十題唔使用腦,極度容易。之後越來越難。
我細個做過類似 test,未 take Mensa test 都已經知道自己要合格無難度。但 Mensa 份卷仍然做唔哂,差左兩題,亂撞。智力有返咁上下嘅你都應該知道唔同人做同一份卷,可以有啲覺得好易有啲覺得好難,難同易係相對而非絕對,根本無客觀準則,所以你知道某個人嘅評價係無乜意義。但如果我要盡可能客觀評價嘅話,我會話份卷啲題目本身其實唔係難,但係你要喺指定時間內完成全份卷,係極難。佢主要係考你速度,唔係考難度。最後十題係一定要用腦諗,但係你個腦嘅轉數有幾快,基本上就係入唔入到會嘅關鍵,因為佢份卷似乎係刻意設計到正常人無可能做得哂咁款,你轉數稍為好少少,已經可以答多一兩題。講到 top 2% 咁細嘅範圍,差少少喺結果上已經好大分別。呢個純粹我自己覺得啦,可能畀另一個會員或者落選者講,會有另一番意見都不一定。
你無問嘅話,應該都已經知道係考乜野同埋點約時間做 test 嗰啲架啦,咁我唔多講喇。話時話我當年係喺中環大會堂一間房裡面考嘅。最後,如果你想知自己有幾大成功機會,你上網搵返丹麥 Mensa 會員自製嗰份仿 Mensa 試題黎做,試下先,都大致會有個底。
2012-10-02 15:45:03 補充:
越前嗰啲題目越容易,需要最小時間,而且好多都真係唔使諗,當然係由淺做到深。如果掉轉次序,花哂時間喺深嘅問題上,分分鐘剩返好多題唔夠時間做。