副學士 面試問題 不是副學士先修!!

我唔係浸會，不過，一般黎講，面試都係個人/小組討論/兩樣

面試形式可以好唔同，有時都睇係咩科，
例如，如果係社會方面既科目social work, sociology, psychology，可能會問同學有關最近時事新聞既議題，咁就要做定功課，睇多啲新聞。而本身，留意時事就應該平時做開，難保你所選擇既科目都會咁樣問問題。

小組討論，無論係咩問題都好，其實最重要都係你有主動參與，只要唔係講廢話，一般都OK。再黎睇既都係溝通技巧，係唔係和善、融洽既語氣、氣氛? 有冇同人眼神接觸? 唔好淨係一味望住個interviewer，全程望住佢反而唔好，因為你係同組員討論，唔係present,表演比interviewer睇。

個人，通常都係問:
點解揀浸大?點解揀呢科?
點解你覺得自己有能力讀呢科? (例如, 有修開accounting揀番accounting就有啲關係、幫助)
你有咩目標? 希望將來既工作係咩?
最近睇左咩書? 如果要你介紹一本書，會係邊本? (文化修養、好學精神都好重要)

至於，自我介紹。除左講自己個名、幾歲，可以講下興趣、喜好，如果同你所揀既科有啲關係，就顯示你真係好想讀嗰科。但一般點會有呀? 唔緊要，照樣講，平時/之前參加開咩課外活動、比賽，感受如何，講幾句。講呢啲既時候，其實已經顯示緊你既個性、長處。面試就係比校方、比interviewer睇下你既個性、除左讀書以外既技能、技巧。講自己既短處唔係唔得，但就一定要準備好點講先至可以講得正面啲，因為你冇理由將自己唔好既一面比人睇。自我介紹如果冇指明，通常都係維持分半至兩分鐘，太長會悶同埋somehow有少少show-off。

面試既語言，一般都係英文為主，不過建議都係中英都準備，得閒就準備埋普通話。

ASSO姐，take it easy。衰啲講，有錢賺學校冇理由唔賺。
放鬆啲，係個人面試既時候，就當係同interviewer傾計，咁樣大家都舒服啲，不過都要表現適當既自信。