靚嘅女仔有臭狐

我細細個嘅時候冇，但係大左某一段時間發現自己有，但係當時唔知係臭狐，日日沖涼都好，身上都有一陣臭味(冇出汗重冇咩嘢，但係出左汗就大件事)，成日都著件外套蓋住，但係就搞到自己熱到幾乎中暑咁，而且點都係被人話好臭，愈搞愈嚴重，而且個人好冇自信，平日嘅生活都好受影響。而這種情況，除左有可能係我本身搞到咁之外，我雙親其中一位都有，所以有可能係遺傳。

咁我個樣又唔係差，都算係靚果類，亦都被人話有氣質，又識著衫，有禮貌咁對人，心地,人品都唔係差，d識我嘅人都知道有咩事我都盡量會幫手，唔會特別怕麻煩或冇錢收而唔幫手。呢幾類都有被陌生人同埋熟人認同過唔少次，但係我偏偏有臭狐，就成日都被人指指點點，被人笑，再唔係就係有人行過我附近就整左一個好臭嘅樣俾我睇。我就係因為咁，人地正常的生活及朋友等等，我都幾乎沒有或很少，我得果少少朋友或比較同我比較好d嘅同學都話我個身好臭好難頂，真係好難過。人地d女仔成日同d同性朋友抱抱鍚鍚咁一齊玩，又鐘意四周圍咁一齊行街，其實我都想，但係我個身咁樣人地行近我都好似當我怪獸咁，我試過叫d人同我玩，本來d人都話好，但一睇清楚係我就立即搖頭話唔好，走都走唔切，更加唔好話同我抱抱之類，果時我d眼淚都幾乎係咁多人面前流左出黎。日常生活都已經咁樣，我有鐘意過d人，我知道自己大多數條件都算ok，除左有d小問題及臭之外，但就臭呢樣嘢都已經係令到人走都走唔切，所以我都只係敢暗戀，從來都唔敢同人表白，有時睇到鐘意嘅人同人地一齊都好難受，d眼淚就流左出黎，但係我又可以點?

我臭左咁多年，被人話足咁多年，而且我又唔係聞唔到，點會唔知自己格啦底臭，但係我都多d飲水，日日沖涼換衫，有時要去d比較遠的地方或要去第到考試，我都已經帶左濕紙巾及一件可以換嘅衫，但係有時我都係要出汗臭，咁我都唔想架嘛，邊個人會想自己個身係臭，成日都被人話?但係d人都唔會諗到，只會識得話我個身好臭，臭到佢地想嘔，個樣好鬼死靚(有d人會話埋我其他條件都好好)但係個身真係臭到嘔，搞到我真係好尷尬，有時真係好想當場大喊，但係死忍左好多次。今日都被幾個人用講或動作來表示給我知道我個身臭，重有d係到笑。搞到自己真係好冇自信，好怕d人係我出汗臭嘅時候走係我附近，搞到我幾乎都唔出街，就係唔想再有咁嘅情況發生。唉，我都唔知點樣生活落去。

唉，有冇咩嘢可以幫我除臭?我試過用止汗產品，但係出左汗重臭，被人話得重慘。我重好後生，但係我已經咁，d舊同學係街到睇到我都重記得我好臭，重n咁大聲講，令我真係想跑走。有d陌生人鐘意我外表，鐘意我有禮貌對人，但係都記得我好臭，有時睇到我都會同身邊嘅朋友講，呢個女仔幾靚架，真係好少睇到會有咁靚，不過可惜呀...你唔好走得咁埋，我試過行係佢身邊聞到佢好臭，好惡頂，幾乎臭到我暈咁濟。

可想而知，我生活點樣過，我都唔知以後點樣過。而且我唔止臭，最近我個頭都有事，細細個嘅問題搞到後腦的髮線向下移，最近變得很明顯，睇落去就好似脫髮咁，被人笑得好慘，我都唔知點解個天要咁玩我。