✔ 最佳答案
冷兵器時代古人打仗時既武功當然係真材實料，否則點樣係秒秒攞命既戰場上生存﹖古代有不少歷史人物武功十分高，當然佢地既武功無金庸小說人物咁誇張，但講出來都幾令人驚奇。
三國時代張飛武功蓋世，天下聞名，演義及大量既電子遊戲過於吹捧呂布，但其實三英戰呂布係虛構情節，有記載話當張飛戰呂布時，張飛一刀劈落去，呂布搵手上既矛硬接，但由於來勢太猛，呂布雙手虎口位即時爆裂流血，呂布自知不敵當然唔敢再打。事實上，後來呂布佔下邳城時都係趁張飛勢孤力弱時偷襲先成功，而且無法生擒張飛。自此之後，戰場上無人係張飛敵手，佢係死於部下趁佢訓覺時既暗殺。
不講不知，魏國大司馬曹仁武功一樣出眾，有次佢有幾百個部下被敵軍圍困，佢單槍匹馬數次出入敵陣解救，最後毫髮未傷，而佢既部下亦得以順利解救。
講武功勁，中國歷史上有多位神射猛將，最早期有漢初飛將軍李廣。佢有一次只帶幾個部下被匈奴人圍攻，憑神箭奇功打到無人敢埋身，最後成功突圍，與張飛一樣，李廣天下無敵，佢於六十幾歲時因不忿被陷害而自殺。
但講到武功蓋世，最傳奇既莫過於唐太宗李世民。佢係當時天下第一神射手用一把長兩米既巨闕天弓打遍天下無敵手。呢類有人咁高既通稱為長弓，係冷兵器時代既核武器，射程可以有嚇死人既800米。長弓手必須要天生神力，而且要從幾歲開始時訓練先可成材，李世民可以隨時使用呢把巨弓，可見佢實在係非常精銳既神射手。與李廣一樣，話說有次佢又係同兩個部下係山邊攰得濟訓著左，好彩有條蛇經過驚醒大家，然後已經發現被敵人團團圍住，同樣係靠佢既神射武功逐一退敵。
佢最偉大既代表作係第二次虎牢關之戰。之前一次有關羽斬華雄，呢一次有李世民生擒竇建德及王世充。兩位都係隋末勢力最大既群雄，王世充甚至已經係洛陽自封為皇。竇建德憑武功及德政建立既強大既夏帝國，王世充聯同佢一齊伐唐，但只經過一個下晝，李世民親自領兵就令兩大君主投降，自此無人能阻唐帝國統一天下。李世民亦因此被封中國史上最高軍階既天策上將，後來亦晉封為諸王之首既秦王，其後再登基為帝。
2012-04-17 20:05:09 補充：
睇來樓主應該係唔多運動既文靜書生。如果你有打過下籃球或者踢下波，反應快既好手永遠一眼關七，唔單止運球流暢自如，而且好似有後眼咁，有無人來偷波一定知。最好籃球員或足球員根本無人可以偷佢地波，而且逢人過人，如入無人之境。
2012-04-17 20:09:41 補充：
戰場亦一樣，最頂尖既軍人幾乎無人可以埋身，因為呢啲人武功太高，常人無可能係正常情況下可以同佢地過招。而且呢啲猛將有一樣常人無既野，就係令人驚奇既勇氣及運氣。有啲人如張飛、李世民等，永遠係戰場第一線作戰，亦永遠無人傷到佢地，當然佢地係勁到爆錶先至可以如入無人之境，但佢地好多時有難以致信既運氣，好運到根本無法殺死佢地。
2012-04-17 20:17:02 補充：
我最睇唔起啲白痴仔話中國武功係花拳綉腿，因為中國人打仗幾千年，冷兵器時代既戰爭一樣極端兇殘驚險，武功稍為低啲都一定無命，上述既猛將打仗打足幾十年，完全無穿無爛，你估佢地如果唔係武功蓋世邊有咁勁﹖以張飛為例，除左下邳城之外，你唸唔唸到有邊場戰役由佢指揮既部隊有比人打敗過或撤退過﹖呢樣野係坊間如汗牛充棟既三國書從來無講過，原因無他，因為寫呢啲書既人通常都唔研究戰役，只係求其吹水算數。
2012-04-17 20:27:18 補充：
古人即使尊貴如皇帝，如果佢生於軍事世家，佢當兵既時間一定極早，通常細過16歲，李世民大概係嗰時加入軍隊。西方歷史中亦有十八歲前當兵或接受軍事教育既猛將皇帝，如馬其頓菲利普二世及亞歷山大大帝兩父子等。呢啲人一世當兵，打遍天下無敵手，不幸既係通常較為短命，原因係佢地唔打仗就無野做，好快就似一朵鮮花一樣凋謝。
