他愛我嗎?我該如何?

雖然可以話係超長，但希望各位睇落去，唔好介意，因為小女子真係好需要你地嘅意見。
事緣係咁，我係半年前識咗個男仔，佢細我一年多少少。我同佢係唔同學校嘅，係係一個課外活動到識。
第一次見時，我係因為有個frd識佢，所以就跟埋佢，分咗做一組一齊活動。起初，佢係同我同我個frd同佢個frd一齊傾計，之後，佢就變咗淨係不停咁撩我一個講野。
果陣時，我係覺得佢好煩，因為佢不停咁係我耳邊講野，我又唔知佢係度講咩。
去到第二次活動(一星期後)，佢就問我攞電話。佢話係有野想搵我幫手，咁我咪俾咗佢囉。之後，佢就開始晚晚打黎。
起初我冇點為意，我諗住佢搵多我幾次就唔會再理我架喇，畢竟
又唔係熟。點知佢打俾我嘅次數越黎越密，仲要其實係係度講埋曬d好無聊嘅野，但每日都起碼講2個鐘電話。我都唔係好明點解自己當時冇cut過佢線架。
果個月，因為我同佢成日講電話，搞到我電話費爆。我同佢講話，我電話就黎冇錢，可能會傾唔到，除非入錢，之後佢就答話俾錢我入。
記得當時同一個有男朋友嘅好友傾計，我地問佢，試過同男朋友講最耐嘅電話係幾耐，佢答兩個鐘，我先覺得自己同果個男仔好似好奇怪。
d同學成日話佢好冧我，係個活動就黎完之前，佢地話個男仔如果唔同我表白，就可能再冇機會見我，不過當然佢冇啦。
其實之後我諗住都唔會有機會再見到佢架，諗住自己對佢嘅小小好感會隨住時間過去而變淡，點知佢有一次約我番學嘅lunch出去食飯。
之後，係佢生日果日，佢約我出黎睇戲。之後，佢不停咁約我，前前後後我地都睇過6-7齣啦。
我地耐唔耐都會一齊食飯，一齊放學，我地一個禮拜平均都會見到2-3次。但電話就一定日日講，我已經由覺得佢煩變到一日唔聽佢把聲就唔安樂啦。
我知道佢同其他女仔食lunch或者有其他嘅交流個心都會勁唔舒服，所以佢每次同其他女仔食飯嘅時候我都會特登打電話比佢又或者send d勁呷醋嘅msg比佢。但係其實佢每次約其他女仔食飯都會預先同我講，係fb嘅chat又會一字不漏咁話俾我聽。
有時我send d msg話我「嬲」佢唔理我或者唔陪我嘅時候，佢又會即刻覆我想令我開心番。
每次我唔開心，打比佢，佢都會安慰我。
但係，盡管如此，曾經有人問過佢(我不在場嘅情況下，依件事係佢自己主動同我講嘅)，佢同我係咪有野，但佢就答唔係，我地只係朋友。
214佢約我出黎，我請咗佢食朱古力，因為係佢要求嘅。但佢就咩都冇做過，冇講過。
其實佢對我真係好好，我叫佢幫我手做嘅野，佢都一定義不容辭咁用最快嘅速度幫我搞掂。
我好鐘意佢，但又唔知應該點做。我真係好想知究竟佢係點諗，男仔係咪對個個女仔都係咁架？我成日都係度諗應唔應該表白，但我又驚佢對我根本唔係依一回事，我驚最後連普通朋友都做唔成，但我唔想失去佢。
究竟我應該點做呀??請各位俾d意見小女子，感激不盡:')
一直看到這裏的，也十分多謝你們，我也知這篇實在長得有點過份了，對不起。