✔ 最佳答案
朋友,你係咪第一次請人?
唔好以為自己冇咩要求就係好老細(講穿左,其實係你唔夠料),打工最怕就係你呢類老細.
請人一定要有要求,等同事只道標準係點,先可以跟住做.
而家呢個年代,幾千蚊人工唔係多,肯做既主要係為學到野,有前景,明白工作既意義,試問連你做老細都嘜7都唔知,跟你果個唔發夢先奇,就正正因為你自己有咁既心態,形成同事都會跟你一樣.
PS:你用"正正常常"去形容,你知唔知睇落去係好刻薄,令人以為你有個錢出糧就好巴閉.
2012-04-05 21:45:46 補充：
" “90s"...，遲到早退..請假唔通知....做事沒交帶...等等問題。叫他們做的時間可能比自己做還要久...也沒有什麽恒心..."
以上既工作態度非90s專利,任何年代既人都可以咁做野,老闆好多時會將以上問題同能力扯上關係,但實在係同佢地既能力無關,冇心做唔係等如冇能力做.
2012-04-05 21:51:59 補充：
問題源於老闆冇將工作既大方向交代.老闆或上司,通常只喜歡交代眼前工作,只會講如何做,但絕口不題為什麼要做,所以下屬只能行屍走肉般工作,咁點會有heart.
上司會認為,比野下屬做係為左減輕自己工作,於是係唔會願意了解下屬想法,亦唔想佢地多問,簡單講幾句就希望可以自動波,下屬被欣賞既機會接近零,原因係在上司眼中,所完成既工作只係手板眼見功夫,咁點會投入.
2012-04-05 22:02:02 補充：
上司與下屬既溝通源於工作,但身份背景&學識經驗令佢地無法溝通,距離愈來愈遠,後生仔女唔撈,係唔會比理由--------既然一齊共事都冇野講,到走果陣仲有咩好講?唔通連走果陣仲要比上司省一餐?點解上司唔可以一開始就放下身段,點解上司唔可以承認自己會錯?
好多時,後生仔做呢類所謂簡單工作,都係得一個人,可能想咁個咁高咁大既同事訴苦都冇.
我會問你,你做野係為咩,你好輕易可以答到;但佢地係唔知道為咩---------上司從來冇講過佢地知係為咩,因為上司只係想塞野比佢地做,打發佢地.
2012-04-05 22:10:03 補充：
你問我有咩高見,我唔敢答你,我唔想對號入座扮有高見,亦或者你係串緊我.人與人相處唔係可以靠方程式,每個人都有其潛能,伯樂在於將千里馬既能力發揮.
我要提醒多你一件事,你既然知道用幾千蚊去請90s係唔work,就證明你係知呢個價錢請唔起"正常人",一方面貪平,一方面又要質量好,明知不可為而為,錯果個係你.
2012-04-05 22:11:20 補充：
ps:一個職位只需要一個人,試下請夠3個人做,一年後就知道除笨有精.
2012-04-05 22:14:04 補充：
ps:我係頂唔順你請人既態度先咁講野,對你係冇敵意,因為我根本就唔識你,所以你唔可以嬲我,知道嗎?
2012-04-07 13:35:45 補充：
一蚊雞博士,我係有實際經驗去答呢條問題,當初面對呢個問題時,我要解決,完全係出於私利,因為我出唔起錢請人,只可以退一步請D冇工作經驗既人.經過10年時間去學習,我知道有D問題係可以解決,有D問題原來係將來會變成有利.
D細路玩失蹤,我當然試過.有一次,我直頭上佢屋企搵佢,成件事我最後係發現,原來係冇錢番工:坐車,食晏既錢係冇,又唔夠膽開口講.咁其實簡單到暈,就索性借比佢,出糧先還.
2012-04-07 13:42:02 補充：
D細路做野雖然冇經驗,但有傻勁,我試過連續幾晚趕工,佢地肯留低幫我.佢地係為幫我,唔想我一個人做哂而自願留低,當然,之前我有教過佢地咩叫無償工作,而平時我一定比佢地準時走,手尾我跟.
D細路做兩做叻左,就會走.好簡單,佢去另一間公司見工,可以扮有經驗識好多野,人工會跳上去(唔係加,係跳),初時都好氣餒,因為浪費心機.後來明白左件事,我反而仲幫佢地寫好封信去見工......最後變成合作伙伴既關係.
2012-04-07 13:48:48 補充：
我自己都後生過,亦試過做人冇方向,但總有一日,自己會醒,係因為有人扶左自己,所以,有能力既時候,就要幫番下一代,大有大幫,小有小幫.肯長期幫人,人生既際遇唔會差得去邊.
好多時都想改變別人,不過改變自會易D.只要立場同原則係堅定,唔需要太擔心.
2012-04-07 13:55:13 補充：
最後係,其實好多問題,老闆都想見招拆招咁去解決,但我就認為,方法固然有,但更重要係思考既大方向,因為冇可能有天書去教人點做老闆.
我又想起遲到既問題,通常我會一開波就講明,遲到唔使罰,但一起身就要比電話,等我知道你番唔番,等我可以安排工作,而只要佢肯番,幾點都可以番黎......其實慢慢都冇咩人遲到,咁仲使咩定校規咁去罰佢地?最慘係有時罰佢地=罰我自己.
