默默喜歡一個人,都幾難受,但又好幸福!

他是我舊同學,我地中四中五都讀同一班,佢份人比較靜同內向,但好乖,讀書成績唔係好好,但就好努力,就係因為佢同其他男仔唔同,比較獨特,性格方面有d似自己,所以對佢好有好感,由開始的好感,演變到後來的喜歡。

但同班兩年裡,我們極少有交集,甚至唔會傾計,只係試過講功課既野,我連佢電話號碼,msn都無...之後畢業前,我比紀念冊紙佢寫,但佢一直都無比番我。

畢業後大家斷哂聯絡,根本無辦法搵到佢,只好放棄,但唔知係緣份定係咩,某一天,我心血來潮開了個facebook帳戶,add番哂好多舊同學,仲竟然比我搵到佢,果一刻真係好開心!之後某天,我主動hi佢,我地一傾就傾左好耐,我仲問佢當年張紀念冊紙點解無比番我?佢話寫完但後來整唔見左,我無怪佢,可以搵得返佢已經好開心。

後來取得他的msn,我地間中都會傾計,仲一傾就會傾好耐,但每次都係我搵佢先,佢唔會自己搵我,但我無所謂,反而有陣時hi佢佢唔應,會諗佢係咪唔想睬我...不過,每次見佢on,個心就卜卜跳,不斷掙扎究竟搵唔搵佢好。朋友知我鐘意佢,都鼓勵我同佢講,但我始終唔敢,怕連朋友都無得做...

後來我入了他讀緊的U讀大專,佢都讀緊,但高我一年級,大家時時都會撞到,但無打招呼無傾計,好奇怪,msn可以傾到咁多,見到面反而無野講。一年好快過,離開學校後,決定唔再搵佢,忘記佢...結果我成年facebook,msn都好少玩。

過左一年,諗住可以忘記佢,去等下一位,但原來唔得,自己根本就呃緊自己,根本放唔低佢,於是我又忍唔住去搵返佢,呢排都有喺facebook搵過佢,但唔知點解,佢應都唔應我,有時仲好快off左...唔明點解之前大家傾計傾得咁開心,而家佢又可以咁冷淡唔想理人?

仲有,我喺佢facebook個page度睇到佢打既內容,我估佢而家一係就有女朋友,一係就有鐘意既人,如果係真既,我會放棄。但而家問題係佢好似好冷淡,搞到大家連朋友都唔似朋友,我唔想咁,我地之前都仲傾得好地地,點解而家可以話唔理你就唔理你架?

想知大家既睇法,可唔可以盡量比d中肯d既意見我?