12年3月去歐洲法國, 瑞士及意大利, 想請教行程及交通安排

小弟係度比啲意見。我個人認為樓主個行程plan得幾好，各地既時間都算合理，只係必須注意少女峰在瑞士中部Interlaken(因特拉肯)，並非Bern，呢兩個係完全唔同既地方，後者據聞無甚可觀，千祈唔好去錯。

點樣由巴黎直接去琉森小弟唔清楚，因為當年兩個地方我係分開去，只知巴黎應該有飛機到瑞士西部大城日內瓦(Geneva)，由日內瓦你可以去到瑞士任何地方。

當年小弟只上過少女峰，不過呢個雪山非常靚，係遊瑞士既重點關鍵，我認為非去不可。講起少女峰有幾件事必須提及，首先如果樓主有買Eurail Pass，除左上少女峰既鐵路半價外，仲包一程係 Interlaken 三個鐘遊湖，個湖又係靚到無得頂，不能錯過。另外，好多人會係 Interlaken 住酒店，但你可以好似我咁到山腰既Wengen小鎮住，係嗰度時刻都望到少女峰。

如果樓主對雪山有興趣，除左鐵力士峰之外，可以唸下去馬特杭峰(Matterhorn)，即係三角朱古力上面個雪山。個山係於瑞士南部小鎮策馬特(Zermatt)隔離，有火車上山，而樓主可由 Interlaken 坐火車都策馬特。個山十分雄偉壯觀，遊客由策馬特搭車會上到3000米左右既Gornergrat遠眺馬特杭峰。

一定要係香港買上述既Eurail Pass ，個pass比你三日內任搭瑞士境內火車而不需另買車飛。呢樣野極端重要，因為瑞士國內以火車為主要交通工具，去任何地方九成以上時間都係搭火車，張pass會成為你既過路金牌，自由乘搭任何火車，一定要有。要留意既係通常Eurail Pass 唔包上山火車既車飛，無論少女峰列車及馬特杭峰列車都只係有半價優惠，但當然已經非常之好。

由瑞士去意大利，一般人都係搭火車到大站Spiez，然後轉乘過境火車，直接去米蘭，不過小弟唔知有無火車由Spiez去威尼斯，一定要問清楚。要注意既係意大利國內城際交通都係搭火車為主，不過係意大利境內搭火車既機會唔多，而且樓主去既係最重要既三大名城，佢地之間既火車班次非常密，去到再買飛都唔遲。另外，幾乎所有人都係由佛羅倫斯出發去比薩睇斜塔，然後番到佛羅倫斯搭火車去羅馬，呢個幾乎係唯一既辦法，所以來回比薩其實係去佛羅倫斯既行程之內既其中一個節目。

Steven, 巴黎有火車去瑞士巴塞爾 (Basel), 再轉車就可以去到琉森
5 小時左右啦