"熱氣"姐係咩

✔ 最佳答案

其實我都諗過呢個問題
我o既結論係咁︰
所謂熱氣就係o的少水份、硬掘掘o既o野食
食o既時候容易刮損個嘴，o係傷口復原能力低o既時候，就變成飛滋
而用油經高溫(油先去到咁高溫，水去唔到)炸、烘、焗、煎o既o野食差唔多全部都係水份少、硬掘掘o既
例如薯片、蝦條、曲奇、餅乾、煎釀三寶(浸o左豉油就林，但係只要仲有少少炸漿硬都會畀佢刮損)、炸雞、煎扒
薯片、蝦條、曲奇、餅乾就由內到外都硬丫
煎釀三寶、炸雞、煎扒呢類就外脆內軟
脆咪即係硬掘掘，易刮損囉！
你諗下食o的好多水份o既o野，例如飯、湯河、烚菜、生果，個口唔係好舒服咩？
o的人咪好鍾意話油炸鬼浸落粥食冇咁熱氣o既？
咪就係咁解囉！
至於花生、開心果、杏仁、合桃等硬殼果仁，坊間買到o既多數都係經過高溫烘焗，呢方面我又覺得唔係幾關烘焗事；易唔易刮算個口我覺得就視乎佢夠唔夠多油，合桃起碼有大半係油，所以最唔刮口，杏仁少o的，花生、開心果再少o的，所以我平時食花生、開心果都有時會刮損條脷o架~
另外，我發覺我食麵包條脷都易損，你唔好睇佢軟林林好鬆軟咁，麵包相對起飯、湯等算係冇乜水(焗o個時o的水都走晒啦呀嘛？)，只係多油(但又唔係多到合桃咁)同好多空氣先好似好林咁，所以我都界定佢為熱氣o野。我亦聽過一個中醫話麵包算係熱氣o野因為經成百幾二百幾度去焗佢，係高溫，所以躁熱。亦因為咁，我見過一個賣中式蒸包o既地方貼住「不溫(唔記得係咪溫，用住先，我遲o的去confirm下再覆)不躁」o黎做宣傳，對比起西式麵包，中式包只係用大約100度o既水蒸氣o黎蒸熟個包，又暖又濕潤，食落口確實舒服o的o既~
所以我建議真係要食熱氣o野o既話，要小心o的，慢慢咀嚼，分泌多o的口水或者飲o的o野去濕潤件食物。
以上只係我o既諗法，歡迎大家討論！

2012-01-26 12:36:40 補充：
哎吔！我都未答完！你揀我做最佳做咩,,,
首先補充番唔係「不溫不躁」係「不寒不燥」~

係呀~我琴日都o岩o岩醒起打邊爐呢樣o野~
我o既解釋係︰
打邊爐就係貪佢夠熱辣辣好少會攤凍o黎食
就係呢種熱辣辣辣傷o左個口/脷
你諗下人體溫度大概係37.8度
新鮮熱辣o係個滾緊o既煲度o既o野係接近一百度
o個o的食物仲要係好多水份而水份係一樣好儲熱能o既物質o黎
一入到你個口就釋放好多熱能出o黎好易熱親個口咪即係傷到o的細胞
我見過新聞話有人打邊爐心急食o左舊好多水份又好熱o既o野(類似生筋o個o的) 即刻成個口起晒o的好大泡o既水泡！搞到要入急症！

2012-01-26 12:56:30 補充：
凍咪成日想飲熱o野
我試過度過我覺得飲落口最舒服o既熱水溫度係幾多
我唔記得準確係幾多度大概係50-70度
只係比人體高十幾至30度

飲凍o野亦一樣太多冰我o地都頂唔順
例如乾冰(二氧化碳)咁好似係-273度我o地掂到會嚴重凍傷
平時就冇機會飲到o的負度數o既o野(都變o左冰？) 茶餐廳凍飲我諗最低咪十度倒(或者我去度下再匯報)
都只係低人體十幾廿度接受得o黎

我諗由中醫角度都係
湯河、烚菜雖然都會煮到100度但通常都會攤凍少少先食
打邊爐近乎即刻食同食新鮮滾熱辣出爐o既蛋撻、麵包、曲奇、炸物差唔多
所以中醫好似都諗為打邊爐係燥熱o野？

2012-01-26 12:57:08 補充：
更正上面︰所以中醫好似都認為打邊爐係燥熱o野？

另外，有o的人食極我o地所謂o既熱氣o野都冇事
我覺得可能係︰
1.基因問題
2.佢o地身體好，細胞有損傷好快就會修復番或者抵抗力好好，唔易畀細菌o係佢o既傷口度滋生
3.佢食o野天生就會分泌好多口水，冇乜機會有傷口或者口水對口腔o既修復能力好好，傷口好快好

最後想講，打邊爐個「邊」字正字好似係「甂」。

發表完畢，多謝各位！

哈哈

回答 (2)