內地孕婦沒完沒了，只要忍痛釋法便可一了百了？

內地孕婦沒完沒了，只要忍痛釋法便可一了百了？


內地孕婦將香港視作「生仔基地」，嚴重加劇公私營醫院壓力，情況到底惡化到乜嘢地步呢？特區政府話就話截龍，醫院拒絕接收冇預約嘅大肚同胞，之不過咁，母愛真係好鬼死偉大㗎，偉大到足以驅使內地孕婦兵行險着。 所謂兵行險着，就係腹大便便嘅內地孕婦索性搵命博，臨急臨忙先至一嘢衝去公立醫院急症室，睇死你唔敢「見胎不救」。根據醫管局數字顯示，內地孕婦去年衝閘生仔嘅個案大幅上升，全年總共有一千六百多名甘冒奇險嘅準媽媽突襲急症室，較前年急增一倍，單計十二月已經有二百零三宗，比前年同期增加一倍三。食物及衞生局局長周一嶽仲話，去年底內地孕婦冒險去急症室產子嘅數目，較年初急增約兩倍，情況令人關注，政府會於三月尾前與私家醫院商討明年嘅配額問題，以便及早規劃本地產科服務喎。都話㗎啦，你有張良計，佢有過牆梯，只係產科截龍係冇用㗎，反而增添不明朗因素，衝閘產子隨時搞出人命。一句講晒，勇者無敵，內地孕婦如水銀瀉地完全無法阻擋，除非你夠膽死置人命於不顧。小朋友出世之前已經問題多多，出世之後一樣極之頭痛。衞生署數字指出，母嬰健康院新登記嘅嬰兒之中，非本地父母所生嘅由○七年一萬零四百個，增至二○一○年嘅一萬四千八百個，增幅百分之四十二。另外，母嬰健康院非本地孕婦所生嘅嬰兒整體比例上升，全港最多新登記嬰兒嘅粉嶺母嬰健康院，二○一○年六成嬰兒都係非本地孕婦嘅骨肉，土生土長嘅土產媽媽變成「弱勢社群」。咦咦咦，有特首參選人話喎，可以利用行政措施解決問題。功夫茶想請教一下，乜嘢行政措施咁巴閉？唔通「封關鎖港」？咪玩啦！所以講到尾，釋法係一了百了嘅解決辦法。冇錯，要求人大釋法會帶來不安情緒，甚至有人擔心破壞一國兩制添。之但係咁喎，經過莊豐源案之後，非本地父母真係有權來港產子，順理成章攞身份證以及享受一切福利。既然特區政府絞盡腦汁都無法阻擋內地孕婦沒完沒了「依法產子」，咁係咪應該從源頭上「依法禁止」呢？你要有法可依，你就必須釋法，就係咁簡單。正所謂長痛不如短痛，釋法係就係有少少痛，不過點都好過忍受不斷逼爆產房、逼爆急症室、逼爆健康院嘅長痛。計功夫茶話齋，如果正為退伍軍人症惡菌攻陷新政府總部而傷腦筋嘅「退伍特首」曾蔭權唔夠魄力，下屆特首無論如何都要提出釋法，否則香港只會繼續陸沉於產子壓力。