「教會創傷壓力症候群(6)」

這十多年來, 教會持續令人失望, 難免令人創傷, 而我亦因此患了教會創傷壓力症候群 , 每次有人提議我返教會, 我都怕怕, 尤其是當記起以下一段往事:

話說約十八年前, 我返了一間基督教教會 , 這間教會大約有一千人左右, (十八年前是一千人, 現在是二千人) , 平時聚會都係唱吓聖詩講吓道咁, 都算正常, 但是有一個星期日, 就突然痴咗線.....

那一日, 台上牧師話自已啱啱得到了神的歡樂恩膏, 而且還要將這些歡樂恩膏 , 傳給我們, 首先要求我們全部企起身, 準備接住神的恩膏, 我曉得他們所說的恩膏, 意指神的超自然能力 , 於是我就碌大雙眼, 看看有什麼神奇嘢發生, 說時遲, 那時快, 牧師竟對住個咪對着觀眾席狂吹氣, 跟住就有好多人跌咗落地, 然後見到有很多信徒走出座位, 高聲尖叫, 大笑, 碌到地上 , 只一剎那間, 個個笑到碌地, 唔停得口, 痴晒線, 有一些信徒則抱頭慘叫, 狀甚痛苦.

而我卻異常地冷靜, 因為我是自閉症患者, 所以感受氣氛和非語言訊息的能力只有普通人的十份之一, 因此無論場面係點, 我的情緒都唔會被影響, 連在場的牧師都發覺我異常冷靜, 與場面氣氛產生强烈對比, 於是牧師便怒啤着我, 特然間, 有一個笑到收唔到聲的女人半仆半行的走到了牧師前面, 牧師問她發生何事, 跟着個女人一直笑一直指着天花版講:「你睇唔到咩, 係耶穌呀! 哈哈哈哈哈..」 , 然後那個女人便仆在地上, 跟着牧師用一雙好陰森的眼神望住我, 並說:「真係不由得你不信.」 原來牧師見我一點也不被當場的盛大氣氛感掩, 意為我唔信佢地.

自這次之後, 香港遊樂場協會 決定唔再租個籃球場俾教會聚會, 因為協會話我地教會既活動太危險, 啲人會情緒失控咁由觀眾席上跌落球場, 跌死咗就麻煩喇, 於是教會唯有唔再幫襯香港遊樂場協會 , 另找地方聚會了.

過了不久, 該教會的弟兄認為我信仰有大問題, 因為我聽唔到神的聲音 , 原來這間教會的信徒, 是經常聽到神大大聲在他們的耳邊說話 , 而又很多時都見到神俾啲圖片佢地睇 , 但係我就從未試過, 所以教中弟兄都認為我有問題, 令神不肯向我說話, 未幾, 他們對我甚至充滿猜疑, 懷疑我是魔鬼派來的內奸, 我在這種情況下, 唯有退出教會.

N年之後, 我開始業餘學習心理學, 才知道原來精神分裂症患者 有86%會有幻聽 , 即係聽到不存在的聲音, 其他多數也會有不同種類的幻覺, 例如幻視 , 即係看到不存在的事物, 並且對於妄想型精神分裂症患者 來說, 妄想越厲害, 幻覺越多, 而據統計, 每一百個人裏, 就有一個是天生的精神分裂症患者 .

我看了這些資料之後, 就發現真相大白了, 這間教會的教友原來大多是精神分裂症患者 , 因為這間教會認同他們的幻覺 , 所以他們感到被接納, 就留了下來, 相反, 其他沒有這些幻覺的信徒, 例如好似我咁, 會不被接納, 甚至被人猜疑是魔鬼的奸細, 所以會自動離開, 久而久之, 會不斷有新的精神分裂症患者 入咗教會之後被接納而留下, 亦不斷有正常人入咗教會之後不被接受而離開, 到了最後, 就會變成成間教會都係精神病患者 .

而且, 他們除了見到幻覺後會互相接納外, 更會將幻覺分享, 這樣的互動, 令他們的妄想更加嚴重, 而這些妄想又會為患者帶來更加多患覺, 惡性遁還, 病情就不斷惡化了.

為了這間教會, 我真的很受傷害, 又要俾人話係魔鬼奸細, 又要被排斥, 連牧師都睇我唔順眼, 到最後, 發覺原來自已唔係入咗教會, 係入咗間有一千個病人的瘋人院.

我覺得, 基督教真係害死佢地, 有精神問題的人已經非常不幸, 但是卻被錯誤教理所蒙敝, 以致沒有尋求適當的治療, 雖然他們會在教會得到接納, 但是精神分裂症 是精神科的重症 , 如果放任不管, 不治療, 不吃藥, 他們的腦神經將會受到更大的損害, 而我認為那班教會高層只是拿着那班教友揾錢, 他們誤導這班在職精神病人, 使能得到他們的金錢奉獻, 而最終這班人將會因為精神病惡化而失去適應社會的能力,真是可悲.

試問見到有人攪教會攪到害人一世, 我的心靈是那麼的受傷害呢? 你們可以幫幫我, 對我所受的傷害, 給我一點有幫助的意見嗎?