初次在淘寶購物

✔ 最佳答案

事實上雖然係完全無明文規定
但人人都係咁響淘寶買野既

1/ 準備好淘寶/支付寶戶口以及比錢既方法（可以係visa網上認證左既信用卡etc或淘點充值好既支付寶（我諗你做左，但一定要準備周全，淘點充定算係信用卡有時用唔到既兩手準備
2/ 執好晒想買野入購物車先，正如你去超市只係執野入車，執車未比錢住，你唔駛諗郵費咁複雜照執就得（當然現實超市咁玩就唔係幾好啦）建議新手集中精神只執1間舖既野入車

* 但係要知道香港有好多野係大陸唔落得香港，拍過比埋錢比埋運費海關話唔過你關就唔過，以香港人買淘寶用得最多既順豐為例可以參考呢個網頁
* 如果係唔送得既咁你番大陸買好過。真係唔得就算數把啦，你既對手唔係唔幫你寄既賣家或者唔幫你送既快遞，而係兩岸既海關。有野直接同海關講。
* 購物車最多只收50種（唔係件）貨。如果你有睇啱其他野未想買或其他舖既野可以按「喜歡」（商品圖片下面）收藏住先，日後再響網頁頂右上「收藏夾」再拎出黎加車

3/ 裝淘寶即時通軟件阿里旺旺（有網上版可以用但建議裝，因為安裝版對話內容先可以做日後申訴證據
4/ 每個賣家既戶口名側根有一個細圖有時黃色有時灰色，黃色代表佢旺旺在線，click下佢就會開個視窗可以好似msn咁同賣家傾計

* 旺旺介面同msn差唔多應該唔難上手。旺旺係繁簡通用唔會亂碼。唯一係唔好亂click link（特別係廣告同你見都未見過既賣家）因為有機會有毒令你有戶口被盜既風險
* 如果灰左就唔好做任何野直至佢在線先再傾。香港唔同大陸運費差幾十皮，而且有好多賣家係明文最憎唔溝（通）佢就亂拍野既行為，雖然一般都會「友善」咁指正番你

5/ 打個招呼。通常淘寶入面可以叫賣家做「掌柜」，佢地稱呼買家（即係你）做「親」（親愛的之意）。第一句：「掌柜你好。我是從香港來的，請問貨品可以寄香港嗎？」
6/ 如果你已經揀定左經咩路（例如順豐或者淘點集運或其他快遞集運之類）咁比較建議你同賣家說明一下你既管道。雖然佢唔一定buy。

* 除左上述快遞或集運，小數人會寄ems，但係限制勁多，新手最好都係先比順豐賺下錢先，因為一次過冇咁易搞錯野而出事，大部份大陸賣家亦都肯用
* 保持禮貌同耐性。大家都唔識，用詞不當一定心生顧忌，交易實做唔成。廣東話同別字同音字或用詞差異可能存在，用語體文溝通。唔識就問，小心解釋。

2012-01-09 05:40:52 補充：
7/ 如果答案係ok，咁再copy你架車入面所有貨品清單問清楚係唔係有貨。如果答都有，咁就可以直接落單（購物車右下「結算」）。
8/ 落左單之後會直接飛去預覽度，請小心檢查貨品數量同種類，係無錯先好入地址（快遞送個人地址，集運參考指示寫集運中轉站地址）再加個人名同手提電話，送張單出去但唔好比錢住。

* 可以話比你知你架車上面既貨係唔一定有。正如你睇catalog訂野，佢唔一定手上有貨即刻比到你。架車十樣入面冇兩三樣都可以好平常。如果冇貨可以問佢幾時番貨或者覆佢下次再黎睇過。千萬唔好落任何「訂」。

2012-01-09 05:41:12 補充：
*** 小心任何明示暗示要你「落訂」（收錢「落單」先今次唔比貨「住」）或類似詞語，無論係佢同你做左幾多次交易。有人係唔熟唔食，收你錢唔比貨山高皇帝遠你咬佢食。係人都知任何官方機構（包括淘寶本身）對投訴處理係極無效率。換句話講，「落訂」收到貨係你好彩過中六合彩，收唔到你只可以當係交學費因為預左實追唔番。我仲有2000蚊響「從小學做**」呢條仆既賣家度未收得番個陣人仔只係0.8唔夠。呢個深仇大恨我祝福佢祖宗十八代手腳整齊。 ***
* 地址同名同電話超重要唔可以錯否則有機會收唔到件。第一次除非有熟人指路你用，否則都係唔建議用集運或中轉站（因為有多重功夫要做

2012-01-09 05:41:49 補充：
* 直到呢度為止運費都係唔駛理住，無論佢定幾多都可以照出單，因為跟住落黎你要同佢傾，張單出左去佢先改得到運費。但唔好比錢住。

9/ 運費方面以順豐直接送上門為例，你可以選擇你而家先比錢賣家做運費，或者係件貨黎到黎你屋企由快遞收你運費（到時要準備好錢
10/ 你請佢響張單度改運費（如果係運費到付就改為0），改好之後旺旺會有提示，你響支付寶或淘寶已買到的寶貝頁面入面會見到佢改左價。再對清楚地址電話同貨品清單，比錢。

** 我知道講價或者要人包郵係大陸不明文既規定，但係咁做唔一定代表你聰明左，反而會令d本質超級孤寒既賣家「贈你幾句」。咁既事做黎無謂，係疏爽既賣家自然會有優惠比你，無謂自取其辱

2012-01-09 05:45:44 補充：
以上都基本解左你個問題
下文呢度貼唔晒
有興趣請睇留言部份

2012-01-09 05:47:53 補充：
貼到貼唔晒……貼埋呢度

寄黎香港都可以包郵？一定係諗多左。以順豐為例30蚊人仔只係首1kg收費，國內一般都係8-10咋。香港咁重皮邊個肯包。
* 集運一定要先比左去中轉站既郵費。地址係按指示咁入，你既姓同電話都要如實咁入，否則寄失係無人可憐。
* 運費你預先比佢係講個信字。唯一好處係大概知舊野大約連包裝有幾大件。如果唔信佢就準備好錢隨時響屋企收件，兩三舊水最安全（雖然斷估好少咁貴，但上住宅仲要附加費30蚊……

11/ 比錢香港人不外乎係用淘點或信同卡。淘點充實好既支付寶可以直接輸入密碼比錢，最簡單。比完成功會話你知，旺旺亦會有信息。

2012-01-09 05:51:11 補充：
12/ 信用卡（其他瀏覽器先用internet explorer重新登入）碌到最下面用visa比錢（確定張visa已經經張卡既銀行網上visa完成認証），佢會入左中國農業銀行個網頁，逐步跟指示入好卡號等資料後係visa認證，密碼入埋成功亦會有訊息顯示

* 用信用卡比錢唔好買保險（找數前唔好剔保險個勾）。會無法用信用卡比錢（個選項唔見左）。已經多手左？即刻碌落7仔或ok買張夠找數既淘點充值，或者同賣家講聲唔好意思手賤左，叫佢取消張單你再開過張新單再叫佢改運費（以下從略
* 事實上淘寶呢個找數程序係一個字面上既過數，實質上係等你確認收貨先會過真金白銀到賣家手上，所以要注意確認收貨依樣野，稍後再講

2012-01-09 05:51:39 補充：
13/ 到呢度買野工序基本完成，只係等佢發貨。不妨多謝下佢辛苦了之類，比小小時間大家諗諗仲有冇野要問要交帶，冇就收線等收貸。以快遞為例通常不出3個工作日甚至隔日就收到
14/ 以快遞為例上門前會打電話比你確定有冇人響屋企，如果你唔響屋企可以搵人代收，但要準備運費（如果係到付）同上住宅區收貨要收偏遠地區附加費。如果收件地址無人，可以另訂時間﹐或者請問佢有邊度近你可以自取（多數係去佢地門市辦工時間拎，講到電話號碼即可

* 賣方發貨後可以響我買到的寶貝入面按物流資料不時留意張單既近況，佢會顯示件貨去到邊。快遞件號亦可貼上快遞公司網站查到進度。如有懷疑可以打去相關快遞問，或者聯絡賣家

2012-01-09 05:53:58 補充：
* 如果用集運，中間既流程仲有其他野搞，例如認領件、比埋到香港運費等等，此處從略。

15/ 收貨時先檢查最外面既包裝，如已經出左問題就要捉住個快遞員理論，千萬唔好簽紙住；收件後即刻開黎睇睇貨件有冇穿爛，夾下張單齊唔齊數
16/ 如果冇咩特別事情發生，去番你件貨度確認收貨﹐順帶好評你既賣家

** 大陸個邊快遞危險到……以釣竿為例，係用pvc管包好都可以盡碎或者成支不翼而飛。賣家成日叫你留住個快遞員拆貨……但係香港同大陸係唔同既……想和做是兩回事的。我自己係未試過成功留住快遞員，亦好彩用順豐咁耐未試過出咩事……

2012-01-09 05:58:25 補充：
** 如果真係不幸出左事……即時影相存證，儘快聯絡賣家先溝通，萬事以和為貴，以臨時缺貨為例通常賣家都會老實交帶送d野代替下……你寧可唔評都唔好中劣評，佢地睇評大過老豆老母，唔好唔記得你地址佢知道，佢可以寄屎上你屋企（大陸真人真事）上門滅門都得（好彩未發生過
** 因以上原因用中轉站同集運會成為趨勢……起碼住址唔駛比個別賣家知，須知當年未有中轉站集運令我慘糟毒手要投鼠忌器……但集運係多野搞，新手真係有人帶下先好搞，費事出事第日連上淘寶都有陰影
** 但必須留意，支付寶響對方發貨10日後就算買家冇確認收件都自動過數（總不能因買家收左貨一句唔記得就唔比錢）所以出左事有任何申訴一定要即時提出，祝你好運

回答 (4)