✔ 最佳答案
每個人都一定有優點亦有缺點,最緊要係自己肯努力去爭取自己想要嘅野!
廿幾歲男仔,如果係頭腦正常四肢健全的,又點會咩都無呢?
最緊要唔好對自己喪失信心,做人千祈唔好自卑,如果自己都睇唔起自己,成日收埋自己怕同人接觸,就更加同外面社會脫節了!
雖然你都可以在網上交朋友,不過大家三唔識七,都好難做到大家真正交心的朋友呀!
如果你識d又係同類人,只能夠互相訴苦抱怨,唔可以鼓勵你努力發奮的話,豈不是更加會令你情緒低落,意志消沉咩?
其實只要自己肯去做野又點會無工做呢?
雖然你無野做,屋企都可以養你,但廿幾歲仔都唔希望一世都靠屋企啦,係嗎?
如果你有工返,就點都無咁悶,唔使成日胡思亂想啦!
所以你最好搵份工先,錢多錢少唔係問題,最重要搵份適合你的能力做嘅!
有工返就有機會發揮自己的能力,同培養自己做人d責任感,就唔覺得時間無聊了!
如果自己肯去同人接觸又點會朋友少呢?
返工點都有d同事,啱唔啱傾都多幾個朋友,屋企樓上樓下踫到d街坊,打聲招呼亦可以傾幾句,有時間得閒就聯絡下d舊同學舊朋友,只要你肯主動接觸,朋友自然會多返d啦!
天生我才必有用嘛,點解會覺得自己無用呢?
俾d信心自己啦,你d才能只係未有機會發揮出來咋!
加油,努力,我支持你 ! ! !