唔知自己係咪有抑鬱症

我本身係個成日收收埋埋唔多鐘意同人講心事既人，應該話我係覺得講自己既心事既時候我好驚比人笑同覺得好尷尬所以唔會講，但係今次真係忍唔住所以係呢個冇人識既地方到講下，希望大家可以聽聽。

我係一個重男輕女既家庭長大，我媽好偏心我哥。我媽都好坦白咁講佢唔鍾意『女』，比較鍾意『仔』。我哥自細都唔會被人罵什至比人打，而我就相反比人打到大，就算喊都會繼續打，因為我媽好憎女仔喊所以會打到我留聲為止。雖然我明白性格上我哥的確好聽話好乖，但係有時候我哥做左同我相同既錯事，我媽都唔會直接罵佢，而係將我罵埋一份，用『你地』，唔係好似罵我咁用『你』。又比如我哥好偏食，所以我媽每天都會特登煮佢會食既野，而唔會特登煮我食既野。有時候會成檯都冇我會食既野，同我哥一樣講唔食既話我會比媽打到食為止，如果我一路喊一路食就會繼續打。所以細個嗰陣寫日記，已經寫過想離家出走、想自殺等等既事，本來以為冇人知，點知原來我媽一早就知，仲當我問玩笑係度笑。當時我真係好尷尬，唔知我媽仲有冇同其他人講過，所以之後我都唔再寫同怕同人講心事。

除左我媽係重男輕女之外，我媽嗰邊都係重男輕女。我哥至少受萬千寵愛，所以親戚都喜歡他，會說他可愛乖巧之類。但係我由細到大都冇比人讚過，仲比外公指住話好憎我，當時我雖然仲細，但係我都係聽得明架。其他親戚以為我聽唔明冇理到，所以之後我一直都有學我哥咁樣，希望其他人可以重新鐘意我，但係冇改變到。我又試過做好多衰樣，希望佢地注意下我都好。點知都係冇，佢地都淨係專注係我哥度。可能有D人會話媽媽以前既童年係點樣，佢地生既仔女既童年會差唔多。但係我可以好肯定咁講，因為我媽係外公既第一粒女，所以佢都係萬千寵愛在一身，所以佢唔明白重男輕女有幾難受。

我爸嗰邊既親戚呢，佢地雖然唔係重男輕女，但係同樣地我一出世就唔鐘意我。可能因為我細個鐘意喊啦，所以佢地成日都嫌棄我，覺得我哥比較好。佢地成日都攞我黎既玩笑，有時候我覺得唔開心架，但係如果我唔跟住笑既話我就會比人話發脾氣。對住我哥既話佢地就唔會咁，因為我哥乖同埋好少講野，佢地怕傷害佢，而唔同我呢種成日笑咩都無所謂既傻婆。

所以細個嗰陣好唔鍾意同我哥出現係同一個場合，因為原本連開我玩笑既人同話緊我既人都會唔再理我，淨係關心我哥。我覺得好似被我哥搶走哂D野咁，所成日一聽到佢唔去同親戚一齊食飯我就會開心，而令到我比人話我唔識珍惜我哥比人罵。而且我一直都好想被人讚，見到我哥成日比人讚讀書叻，我都會努力咁讀好D，但係我無論幾高分都好，所有人都只會在意我數學幾低分，唔同我哥一樣數學好好。
慢慢我就冇再在意過攞幾分，覺得合格就好。

直到而家，因為我哥唔多鐘意去D好嘈同人多既地方，所以親戚少見左佢，佢地就將D注意力放番係我度，雖然唔算係好事。因為我明白只要我哥一出現，注意力就會番番去我哥身上，既然冇可能擁有到，咁不如一開始就唔好發生。而且佢地既關心方式同關心我哥既方式完全唔同，佢地係要控制我既生活習慣，比如我唔想拍拖，佢地會話我係同性戀。未來我唔想生仔，佢地會串我揾到個肯同我生先算等等。所以我先寧願佢地唔好再理。

其實呢D野本身有時都會諗起個心口抽抽下，但係最近發生左D事所以諗得好密。
我有一個表弟，佢係我外公既第一粒男孫，所以每個人都鍚到佢燶，久而久之，佢就比人寵到變左做個港孩。而家我外公既人都想改正番佢既態度，但係其實都已經冇辦法，因為點罵都冇用，佢都唔會驚仲會變本加厲去做。有時我同我媽講說叫佢地唔好咁寵他，我媽總有千萬個理由為護表弟。比如話佢媽媽要番工，缺乏母愛所以先會成咁，話佢只係想引人注意之類。有時見到我表弟蝦緊我媽嗰陣都會諗，點解你會明白我表弟既感受而唔明我既感受？你係我阿媽唔係應該比較明白我既咩？

第二件事就係，呢幾日先比我爸後比我媽話我做人好有問題。先講我爸，當時同緊親戚食飯，我表弟突然話常食蝦，婆婆已經夾左兩三隻比佢，佢話要四隻，伸手繼續夾落自己個碗，所以我只係話左佢聲『你夾哂，人地唔使食』咁，我爸就叫我唔好理佢，之後食完飯當住全部親戚面前話我同我表弟一樣格，當時我真係覺得好難受，我幾時做過同佢一樣咁既事？我真係唔明。
之後過左幾日，屋企有一罐應該係人地送既野食，我肚餓想開黎食但係我媽話咁唔好，但係我真係肚餓想開，我媽就罵我話我做人可唔可以唔好做到咁。所以我究竟做左D咩咁唔好？我真係完全唔明白點解。

呢幾日我既心情都好差，個腦全部都係頭先講既事。已經習慣左點都唔喊既我真係忍唔住，因為我冇自己一間房，所以每晚都等所有人訓哂，我先喱係個被窩道忍住唔出聲咁喊。如果比人知我喊既話就大獲。

之後我去做左D心理測驗，比如憂鬱王子之類既，我都攞好高分。我唔知應該可以點做，因為我好怕面對面同人講我頭先講既野。同屋企人講佢地一定會罵到我痴線，同朋友講佢地唔會明白(我講過)，更加唔可以去睇醫生，因為比屋企人知我一定會比死更難受，我究竟應該點做好.........